ઓરેકલ તેના રોકાણપ્રવાહ પરના દબાણમાં ઘટાડો કરવા મોટાપાયે ખર્ચકપાતના પગલાં લઇ શકે છે. આ અગ્રણી સોફ્ટવેર કંપની તેના કર્મચારીઓની સંખ્યામાં 20,000થી 30,000નો ઘટાડો કરે તેવી શક્યતા છે. તેનાથી 8થી 10 અબજ ડોલરનો રોકાણપ્રવાહ ઊભો થઈ શકે છે. નોકરીમાં કાપ ઉપરાંત કંપની તેના હેલ્થકેર સોફ્ટવેર યુનિટના કેટલાંક બિઝનેસનું પણ વેચાણ કરી શકે છે. આ બિઝનેસ 2022માં તેને 28.3 અબજ ડોલરમાં ખરીદ્યો હતો. એમ સીઆઇઓના રિપોર્ટમાં જણાવાયું હતું.
મુખ્ય કારણ સામ ઓલ્ટમેનની કંપની ઓપનએઆઇ’ સાથેની અબજો ડોલરની ભાગીદારી હોવાનું માનવામાં આવે છે. અહેવાલ મુજબ ઓરેકલ અને ઓપનએઆઇ વચ્ચે આર્ટિફિશિયલ ઈન્ટેલિજન્સ ક્ષેત્રે આશરે 156 અબજ ડૉલરની ભાગીદારી કરી છે, જે કંપની માટે અત્યંત ખર્ચાળ સાબિત થઈ રહી છે. આ ભાગીદારીને જાળવી રાખવા અને AI ડેટા સેન્ટર્સના નેટવર્કને ઊભું કરવા માટે કંપનીને મોટા પાયે રોકડની જરૂર છે. તેથી ઓરેકલ આ છટણી કરીને આશરે આઠથી 10 અબજ ડૉલરનો કેશ ફ્લો ઊભો કરવા માગે છે.
ઓરેકલે માત્ર છેલ્લા બે મહિનામાં ડેટા સેન્ટર્સ બનાવવા માટે 58 અબજ ડોલરનું દેવું કર્યું છે. હાલ કંપની પર કુલ દેવું 100 અબજ ડોલરને પાર કરી ગયું છે. અમેરિકાની અનેક બેંકોએ ઓરેકલના ડેટા સેન્ટર પ્રોજેક્ટ્સ માટે લોન આપવાનું ઓછું કરી દીધું છે અથવા વ્યાજદરમાં ધરખમ વધારો કર્યો છે. આ સ્થિતિમાં આર્થિક તંગીને કારણે હવે ઓરેકલ નવા ગ્રાહકો પાસેથી કોન્ટ્રાક્ટની 40% રકમ એડવાન્સમાં માંગી રહ્યું છે.
