ન્યૂયોર્કના લાગાર્ડિયા એરપોર્ટ રન-વે પર રવિવારની રાત્રે એર કેનેડા એક્સપ્રેસનું પેસેન્જર વિમાન ગ્રાઉન્ડ પરની ફાયર ટ્રક સાથે અથડાતા એક પાયલટ અને સહ-પાયલટનું મોત થયું હતું. આ દુર્ઘટનામાં બે ફાયર ફાઇટર સહિત ઓછામાં ઓછા 13 લોકો ઘાયલ થયા હતાં, એમ યુએસ મીડિયા રિપોર્ટ્સમાં જણાવાયું હતું. એરપોર્ટના રનવે 4 પર આવનારી ફ્લાઇટ ફાયર એન્જિન સાથે અથડાઈ હતી.
દુર્ઘટનાને પગલે એરપોર્ટ બંધ કરવામાં આવ્યું હતું. મોન્ટ્રીયલથી આવી રહેલ CRJ-900 વિમાને લગભગ 24 માઇલ પ્રતિ કલાક (39 કિમી પ્રતિ કલાક)ની ઝડપે વાહનને ટક્કર મારી હતી. આ જેટનું સંચાલન એર કેનેડાની પ્રાદેશિક ભાગીદાર જાઝ એવિએશન કરે છે. પ્રાથમિક માહિતી મુજબ આ વિમાનમાં 72 મુસાફરો અને ચાર ક્રુ મેમ્બર હતાં.
યુએસ ફેડરલ એવિએશન એડમિનિસ્ટ્રેશન (FAA)એ 0530 GMT સુધી એરપોર્ટ પર તમામ વિમાનો માટે ગ્રાઉન્ડ સ્ટોપ જારી કર્યો છે. લાગાર્ડિયાની વેબસાઇટ મુજબ એરપોર્ટ આવતા વિમાનોને અન્ય એરપોર્ટ તરફ વાળવામાં આવ્યા હતાં અથવા તેમના મૂળ સ્થાને પાછા ફર્યા હતાં.
સોશિયલ મીડિયા પર ફૂટેજમાં વિમાનના આગળના ભાગને નુકસાન થયું હોવાનું દર્શાવવામાં આવ્યું હતું. સોશિયલ મીડિયા પર આ અથડામણના ઘણા વીડિયો જોવા મળ્યા હતાં. તેમાં એરપોર્ટ પર રેસ્ક્યુ કામગીરી ચાલતી હોવાનું દર્શાવાયું હતું.
યુએસ નેશનલ ટ્રાન્સપોર્ટેશન સેફ્ટી બોર્ડ (NTSB)એ જણાવ્યું હતું કે તે ઘટનાની તપાસ માટે ટેકનિકલ નિષ્ણાતોની એક ટીમ તૈનાત કરી રહ્યું છે.
