શાહરુખ ખાનની બહુચર્ચિત અને મોંઘેરી ફિલ્મ ‘કિંગ’નું બજેટ વધી રહ્યું છે. આ ફિલ્મમાં બોલીવૂડની સૌથી મોટી કાસ્ટ લેવામાં આવી છે. સિદ્ધાર્થ આનંદ દિગ્દર્શતિ આ ફિલ્મ ભારતીય ફિલ્મ ઉદ્યોગની સૌથી મોટી ફિલ્મ બની રહી છે. સૂત્રોના જણાવ્યા મુજબ આ ફિલ્મ 350 કરોડના બજેટ સાથે બની રહી છે અને તેને 2026માં જ રીલીઝ કરાશે. આ બજેટમાં હજુ શાહરુખ અને ટીમ તેમ જ ફિલ્મની પબ્લિસિટીનો ખર્ચ સમાવેશ કરવામાં આવ્યો જ નથી.
આ એક્શન થ્રિલર ફિલ્મની શરૂઆત જેમાં શાહરુખનો એક લાંબો કેમિયો હોય એ રીતે થઈ હતી, જેનું દિગ્દર્શન સુજોય ઘોષ કરવાના હતા. શરૂઆતમાં આ ફિલ્મનું બજેટ 150 કરોડ હતું. પરંતુ આ ફિલ્મની સ્ક્રિપ્ટને વધુ સારી અને વધુ મોટી બનાવવાની શક્યતા હતી. જ્યારે સિદ્ધાર્થ આનંદની દિગ્દર્શક તરીકે એન્ટ્રી થઈ, તો એ શાહરુખ ખાન સાથે બેઠા અને એક મોટા સ્કેલની ફિલ્મ બનાવવાનું નક્કી કર્યું, તેમાં ક્યારેય જોવા ન મળી હોય એવી એક્શન સિક્વન્સ ડિઝાઇન કરવામાં આવી. શાહરુખ એક એવો પ્રોડ્યુસર છે, જે દર્શકોને મજા કરાવવા અને મોટા પડદે જોવામાં અલગ અનુભવ કરાવે એવા દૃશ્યા તૈયાર કરાવે છે. તેણે સિદ્ધાર્થ આનંદને તમામ છૂટછાટો આપીને 350 કરોડનું બજેટ નક્કી કર્યું હતું.”
શાહરુખને સિદ્ધાર્થનું આ ફિલ્મ માટેનું વિઝન ગમ્યું અને તેણે જે પ્રકારના સીન વિચાર્યા હતા તેનાથી શાહરુખને આશ્ચર્ય થયું હતું. સૂત્રે જણાવ્યું કે, “કિંગ એક ભારતમાં નિર્મિત વૈશ્વિક ફિલ્મ છે. પશ્ચિમી દેશોમાં જે પ્રકારની ફિલ્મ બનાવવામાં લાખો ડોલર ખર્ચાઈ જાય છે, તે ફિલ્મ સિદ્ધાર્થ આનંદ તેના પાંચમા ભાગના ખર્ચમાં જ બનાવી રહ્યા છે. આ ફિલ્મમાં છ મોટા એક્શન સીન પણ છે, જેની પરફેક્ટ ડિઝાઈન કરવામાં આવી છે. તેમાંથી ત્રણ સીન તો વાસ્તવિક લોકેશન પર શૂટ કરવામાં આવ્યા છે, જ્યારે બાકીના ત્રણ સીન સેટ પર શૂટ કરવામાં આવશે.”
શાહરુખની એન્ટ્રી જે એક્શન સીનથી થવાની છે, તેના માટે જ ખુબ મોટો ખર્ચ કરવામાં આવ્યો છે, તે આ ફિલ્મનો સૌથી મોટો અને મહત્વનો સીન હશે. આ ફિલ્મને ગૌરી ખાન અને મમતા આનંદે પ્રોડ્યુસ કરી છે.
આ ફિલ્મમાં શાહરુખની સાથે તેની પુત્રી સુહાના પણ છે. તે ઉપરાંત આ ફિલ્મમાં દીપિકા પાદુકોણ, અભિષેક બચ્ચન, રાની મુખર્જી, રાઘવ જુયાલ, અનિલ કપૂર, જેકી શ્રોફ, અરશદ વારસી, સૌરભ શુક્લા, જયદીપ આહલાવત, અભય વર્મા અને અક્ષય ઓબેરોય સહીતના કલાકારો છે. જયદીપ અને રાઘવ પહેલી વખત શાહરુખ સાથે કામ કરશે, જ્યારે જેકી શ્રોફ, અનિલ કપૂર અને શાહરુખે છેલ્લે 1995માં ત્રિમૂર્તિ ફિલ્મમાં સાથે કામ કર્યું હતું. શાહરુખને હાથમાં ઇજા થવાથી આ ફિલ્મનું શૂટિંગ થોડા સમય માટે અટકાવાયું હતું.
