ઓસ્ટ્રેલિયાના દિગ્ગજ સ્પિનર શેન વોર્ન માત્ર બોલિંગમાં જ નહીં, પરંતુ ભવિષ્યને ધ્યાનમાં રાખીને યોગ્ય નિર્ણય લેવામાં પણ માસ્ટર હતાં. 2008માં તેઓ આઇપીએલની ફ્રેન્ચાઇઝી રાજસ્થાન રોયલ્સના કેપ્ટન બન્યાં, ત્યારે તેમણે પોતાના કોન્ટ્રેક્ટમાં એક ખાસ કલમ ઉમેરાવી હતી.
તેનાથી હવે લગભગ બે દાયકાઓ પછી તેમના પરિવારને મોટો ફાયદો થશે. રાજસ્થાન રોયલ્સને અમેરિકાના ઉદ્યોગપતિ કાલ સોમાણીની આગેવાની હેઠળના કન્સોર્ટિયમને લગભગ 1.63 બિલિયન ડોલર (અંદાજે ₹15,290 કરોડ)માં વેચવામાં આવી છે ત્યારે આ કલમ લાગુ પડી છે.
2008માં કરાર કરતી વખતે વોર્ને એવી શરત રાખી હતી કે તેઓ ટીમ સાથે જેટલા વર્ષ રમશે, તે દરેક વર્ષ માટે તેમને ટીમનો 0.75% માલિકી હિસ્સો મળશે. વોર્ને કુલ 4 સીઝન રમ્યા હતાં, તેથી તેમને કુલ 3% હિસ્સો મળ્યો છે. ટીમના વેચાણ પછી આ 3% હિસ્સાની કિંમત અંદાજે ₹450થી ₹460 કરોડ જેટલી થાય છે. તેથી વોર્નના પરિવારને આટલો મોટો આર્થિક લાભ મળશે.
2026ની IPL સિઝન પછી તેમના પરિવારને આ હિસ્સો વેચવાની મંજૂરી મળશે. જોકે આ માટે બોર્ડ ઓફ કંટ્રોલ ફોર ક્રિકેટ ઇન ઇન્ડિયાની મંજૂરી જરૂરી રહેશે
વોર્ને 2008માં રાજસ્થાન રોયલ્સને પહેલી જ સીઝનમાં ચેમ્પિયન બનાવી હતી. 2022માં તેમના અવસાન છતાં તેમની દૂરદર્શિતા આજે તેમના પરિવાર માટે આશીર્વાદ બની છે
