અમેરિકામાં આશરે 50 કરોડ લોકોના સંવેદનશીલ સોશિયલ સિક્યુરિટી ડેટા લીક થયા હોવાની આશંકા વચ્ચે પ્રેસિડન્ટ ડોનાલ્ડ ટ્રમ્પનું અગાઉનું ‘ડિપાર્ટમેન્ટ ઓફ ગવર્નમેન્ટ એફિશિયન્સી’ (DOGE) તપાસના ઘેરાવામાં આવ્યું છે. આ ડિપાર્ટમેન્ટના પૂર્વ સર્વિસ એન્જિનિયરે નોકરી છોડ્યા પછી ગેરકાયદે આ સંવેદનશીલ ડેટા મેળવ્યો હતો અને ટ્રાન્સફર કરવાનો પ્રયાસ કર્યો હતો. એક વ્હિસલબ્લોઅર કરેલી ફરિયાદને આધારે આ મામલે તપાસ ચાલુ કરાઈ છે, એમ વોશિંગ્ટન પોસ્ટના એક અહેવાલમાં જણાવ્યું હતું.
રીપોર્ટમાં સૂત્રોને ટાંકીને જણાવ્યું હતું કે સોશિયલ સિક્યોરિટી એડમિનિસ્ટ્રેશનની ઇન્સ્પેક્ટર જનરલ ઓફિસે તપાસ શરૂ કરી છે અને આ મામલે કેટલીક સંસદીય સમિતિઓને પણ માહિતી અપાઈ છે. આ ઉપરાંત ગવર્નમેન્ટ એકાઉન્ટિબિલિટી ઓફિસને પણ આ મુદ્દે જાણ કરાઈ છે.
ફરિયાદમાં જણાવાયું છે કેઆ ભૂતપૂર્વ એન્જિનિયરે અગાઉ સોશિયલ સિક્યુરિટી એડમિનિસ્ટ્રેશનમાં કામ કર્યું હતું અને પછી ઓક્ટોબરમાં એક સરકારી કોન્ટ્રાક્ટર કંપનીમાં જોડાયો હતો. તેને દાવો કર્યો હતો કે તેની પાસે બે અત્યંત સંવેદનશીલ ડેટાબેઝની નકલો છે.
ફરિયાદમાં ઉલ્લેખ કરાયેલા ડેટાબેઝ ‘ન્યુમિડેન્ટ’ અને ‘માસ્ટર ડેથ ફાઇલ’ તરીકે ઓળખાય છે, જેમાં જીવિત અને મૃત્યુ પામેલા 50 કરોડથી વધુ અમેરિકનોના રેકોર્ડ છે. તેમાં સોશિયલ સિક્યુરિટી નંબર, જન્મ તારીખ, નાગરિકતા, જાતિ, વંશ અને માતા-પિતાના નામ જેવી વ્યક્તિગત માહિતી સામેલ છે.
અહેવાલ મુજબ એન્જિનિયરે સહ-કર્મચારીઓને જણાવ્યું હતું કે તેને આ ડેટા થંબ ડ્રાઈવમાં કોપી કર્યો હતો અને તેને પોતાના વ્યક્તિગત કમ્પ્યુટરમાં ટ્રાન્સફર કરીને “સેનીટાઇઝ” કરવાની યોજના બનાવી હતી, જેથી નવી કંપનીમાં તેનો ઉપયોગ કરી શકાય. જોકે કાયદાકીય ભયને કારણે એક સહ-કર્મચારીએ મદદ કરવાનો ઇનકાર કર્યું હતું. આક્ષેપો વચ્ચે અધિકારીઓએ જણાવ્યું છે કે હાલ સુધી ડેટા બહાર ટ્રાન્સફર થયો હતો કે નહીં તે સ્પષ્ટ થયું નથી.
