અમેરિકાની લો-કોસ્ટ એરલાઇન સાઉથવેસ્ટ એરલાઇન્સે 4 જૂનથી શિકાગોના ઓ’હેર ઇન્ટરનેશનલ એરપોર્ટ અને વોશિંગ્ટન ડલેશ ઇન્ટરનેશનલ એરપોર્ટથી તેની ફ્લાઇટસ સર્વિસ બંધ કરવાની જાહેરાત કરી હતી.
એરલાઇનના જણાવ્યા અનુસાર આ નિર્ણય નેટવર્કને વધુ અસરકારક બનાવવા માટે લેવામાં આવ્યો છે. જોકે શિકાગો એરિયામાં કંપની પોતાની સેવા ચાલુ રાખશે અને શિકાગો મિડવે ઇન્ટરનેશનલ એરપોર્ટ પરથી ફ્લાઇટ્સ ચાલુ રહેશે. કંપનીના પ્રવક્તાએ જણાવ્યું કે ઓ’હેર એરપોર્ટ પરથી કામગીરી કરવી પડકારજનક બની હતી, જ્યારે મિડવે એરપોર્ટ દ્વારા સમગ્ર શિકાગો એરિયામાં સેવા આપી શકાય છે.
એરલાઇન વોશિંગ્ટન એરિયાના બંને એરપોર્ટથી 79 સ્થળો પરની વધારાની 271 ફ્લાઇટ્સ ચાલુ રાખશે. સાઉથવેસ્ટે 2021માં ઓ’હેર એરપોર્ટ પર સેવા ચાલુ કરી હતી. જોકે આ પછી તે નાણાકીય મુશ્કેલીનો સામનો કરી રહી છે. કોરોના મહામારી પછી આ એરપોર્ટ પરની સ્પર્ધામાં તીવ્ર વધારો થયો હતો. આ નિર્ણયથી અસરગ્રસ્ત કર્મચારીઓને કંપનીના અન્ય નેટવર્કમાં ઉપલબ્ધ નોકરીઓ માટે અરજી કરવાની તક આપવામાં આવશે. તેમાં મિડવે એરપોર્ટ સહિત અન્ય શહેરોમાં ઉપલબ્ધ જગ્યાઓનો સમાવેશ થાય છે.
