પશ્ચિમ એશિયામાં સંઘર્ષનો ઉકેલ આવવાનો સંકેત આપતા અમેરિકાના પ્રેસિડન્ટ ડોનાલ્ડ ટ્રમ્પે સોમવારે જણાવ્યું હતું કે ઇરાન સાથે ફળદ્રુપ વાતચીત પછી તેમણે ઈરાની પાવર પ્લાન્ટ અને ઉર્જા માળખા પરના હુમલા પાંચ દિવસ સુધી મુલતવી રાખવાનો યુએસ મિલિટરીને આદેશ આપ્યો છે. અમેરિકા અને ઈરાન વચ્ચે વાટાઘાટો થઈ છે, જેમાં બંને પક્ષો વચ્ચે મુખ્ય મુદ્દાઓ પર સંમતિ સધાઈ છે. યુદ્ધનો ઉકેલ લાવવા માટે ટૂંક સમયમાં એક સોદો થઈ શકે છે
28 ફેબ્રુઆરીએ ઇરાન પર હુમલા પછી ટ્રમ્પે તંગદિલીમાં ઘટાડો થવાનો પ્રથમ વખત જાહેરમાં સંકેત આપ્યો હતો. જોકે ટ્રમ્પની આ જાહેરાતની હાંસી ઉડાવતા ઈરાની સરકારી મીડિયાએ જણાવ્યું હતું કે યુએસ પ્રેસિડન્ટે ઈરાનના સંભવિત બદલોના ભયથી પીછેહઠ કરી છે.
ટ્રમ્પે પોતાના સોશિયલ મીડિયા પ્લેટફોર્મ પર એક નિવેદનમાં લખ્યું હતું કે મને એ જણાવતા આનંદ થાય છે કે અમેરિકા અને ઈરાન વચ્ચે છેલ્લાં બે દિવસમાં મધ્ય પૂર્વમાં દુશ્મનાવટના સંપૂર્ણ નિરાકરણ અંગે ખૂબ જ સારી અને ફળદ્વુપ વાતચીત થઈ છે. આ મંત્રણા સમગ્ર સપ્તાહ સુધી ચાલુ રહેશે. જોકે આ ઊંડાણપૂર્વકની, વિગતવાર અને રચનાત્મક વાતચીતનાના આધારે મેં સંરક્ષણ વિભાગને ઈરાની પાવર પ્લાન્ટ્સ અને ઉર્જા માળખા પરના તમામ લશ્કરી હુમલાઓને પાંચ દિવસના સમયગાળા માટે મુલતવી રાખવાનો આદેશ આપ્યો છે. જોકે આ આદેશ હાલની બેઠકો અને ચર્ચાઓની સફળતાને આધીન છે. આ વિરામ કામચલાઉ છે અને સંપૂર્ણપણે વાટાઘાટોની પર પ્રગતિ પર આધારિત છે.
ટ્રમ્પે જણાવ્યું હતું કે અમેરિકા અને ઈરાન વચ્ચે વાટાઘાટો થઈ છે જેમાં બંને પક્ષો વચ્ચે મુખ્ય મુદ્દાઓ પર સંમતિ સધાઈ છે. યુદ્ધનો ઉકેલ લાવવા માટે ટૂંક સમયમાં એક સોદો થઈ શકે છે.તેમના મધ્ય પૂર્વના રાજદૂત સ્ટીવ વિટકોફ અને નજીકના સહાયક અને જમાઈ જેરેડ કુશનરે રવિવારે ઈરાની અધિકારીઓ સાથે વાતચીત કરી હતી અને ચર્ચા ચાલુ રહેશે. હું ફક્ત એટલું જ કહી રહ્યો છું કે આપણે સોદો કરવાની વાસ્તવિક શક્યતાના આરે છીએ.
ઇરાનના કયા નેતા સાથે વાતચીત ચાલુ રહી છે તેનો ફોડ પાડ્યા વગર યુએસ પ્રેસિડન્ટે જણાવ્યું હતું કે ઈરાનના સર્વોચ્ચ નેતા આયાતુલ્લાહ મોજતબા ખામેની વાતચીત થઈ રહી નથી. ઈરાનમાં કેટલાક નેતાઓ બાકી છે. અમે એવા વ્યક્તિ સાથે વ્યવહાર કરી રહ્યા છીએ જે મારા મતે સૌથી આદરણીય નેતા છે.
જોકે ઈરાનની ફાર્સ ન્યૂઝ એજન્સીએ એક સૂત્રને ટાંકીને જણાવ્યું હતું કે અમેરિકા સાથે કોઈ પ્રત્યક્ષ કે પરોક્ષ વાતચીત થઈ નથી. ટ્રમ્પની આ જાહેરાતથી બ્રેન્ટ ક્રૂડ ઓઇલ ફ્યુચર્સના ભાવમાં ઘટાડો થયો હતો, અન્ય અગ્રણી ચલણો સામે ડોલર ઘટ્યો હતો અને વૈશ્વિક શેરબજારોમાં તેજી આવી હતી.
