અમેરિકાના પ્રેસિડન્ટ ડોનાલ્ડ ટ્રમ્પ અમેરિકાના સ્વતંત્રતાના 250 વર્ષ પૂર્ણ થવાના અવસરે બહાર પાડવામાં આવનારા સોનાના સિક્કા પર ચમકશે. 24 કેરેટ સોનાના આ સ્મારક સિક્કામાં ટ્રમ્પને “રિઝોલ્યુટ ડેસ્ક” પર મુઠ્ઠી ભીંસીને ઉભેલા દર્શાવવામાં આવશે. જીવિત પ્રેસિડન્ટને સોનાના સિક્કા પર દર્શાવવાનો આ માત્ર બીજો પ્રસંગ હશે. જોકે આ પગલાની કાનૂની માન્યતા સવાલો પણ ઊભા થયા છે. આગામી 4 જુલાઈના રોજ અમેરિકાના 250મા સ્થાપના દિવસની ઉજવણીના ભાગરૂપે આ ખાસ સિક્કો બહાર પાડવાનું આયોજન કરાયું છે.
આ પહેલા 1926માં યુએસની સ્વતંત્રતાના 150 વર્ષની ઉજવણી માટે બહાર પાડવામાં આવેલા સિક્કામાં 30મા યુએસ પ્રેસિડન્ટ કેલ્વિન કુલિજ અને જ્યોર્જ વોશિંગ્ટનને દર્શાવવામાં આવ્યાં હતાં.
19 માર્ચે થયેલી બેઠકમાં યુએસ કમિશન ઓન ફાઇન આર્ટસે આ સ્મારક સિક્કાના ડિઝાઇનને મંજૂરી આપી હતી. અંતિમ માપ નક્કી થયા બાદ સિક્કા મિન્ટ કરાશે.
અમેરિકાના ટ્રેઝરર બ્રાન્ડન બીચના નિવેદન મુજબ આપણે દેશના 250મા જન્મદિવસ તરફ આગળ વધી રહ્યા છીએ, ત્યારે દેશની અવિનાશી ભાવના અને લોકશાહીને દર્શાવતા સિક્કા તૈયાર કરવા માટે અમે ઉત્સાહિત છીએ અને આવા સિક્કા માટે વર્તમાન પ્રેસિડન્ટ ડોનાલ્ડ ટ્રમ્પ કરતાં વધુ પ્રતીકાત્મક ચહેરો બીજો કોઈ નથી.
અમેરિકાના ફેડરલ કાયદા અનુસાર જીવિત પ્રેસિડન્ટને ચલણી સ્મારક સિક્કામાં દર્શાવી શકાય નહીં. જોકે બીચે જણાવ્યું કે આ સ્મારક સિક્કો સામાન્ય ચલણથી અલગ હશે અને અંતિમ ડિઝાઇન તથા મિન્ટિંગ માટેનો નિર્ણય ટ્રેઝરી પ્રધાનના અધિકારમાં આવે છે.
ડેમોક્રેટિક નેતાઓએ આ પગલાની ટીકા કરી હતી. ઓરેગોનના સેનેટર જેફ મર્કલીએ કહ્યું હતું કે “રાજાઓ અને તાનાશાહો સિક્કા પર પોતાનો ચહેરો મૂકે છે, લોકશાહી દેશોના નેતાઓ ક્યારેય આવું કરતાં નથી.
ટીકાકારોનું માનવું છે કે ટ્રમ્પ દ્વારા પોતાની છાપ છોડવાનો આ એક વધુ પ્રયાસ છે. અગાઉ કેનેડી સેન્ટરનું નામ બદલીને “ટ્રમ્પ-કેનેડી સેન્ટર ફોર પરફોર્મિંગ આર્ટ્સ” કરવામાં આવ્યું હતું અને યુએસ ઇન્સ્ટીટ્યૂટ ઓફ પીસની ઇમારત સાથે પણ તેમનું નામ જોડવામાં આવ્યું હતું.
