બોલીવૂડમાં ધીરે ધીરે પોતાનું સ્થાન જમાવી રહેલ યુવા અભિનેતા પ્રતીક ગાંધી પડકારજનક ભૂમિકા સ્વીકારી રહ્યો છે. તે હવે રિતિક રોશન દ્વારા નિર્મિત એમેઝોન પ્રાઇમ વીડિયો પર આવનારી થ્રિલર ફિલ્મમાં એવા વ્યક્તિનું પાત્ર ભજવે છે જેને ઓબ્સેસિવ કમ્પલસિવ ડિસઓર્ડર (ઓસીડી) છે અને તેનું પાત્ર અણધાર્યા નિર્ણયો લે છે.
આ આ અંગે પ્રતીક કહે છે, ‘ આ ફિલ્મનું દિગ્દર્શન રાજેશ કૃષ્ણન કરી રહ્યા છે. રિતિક અને તેના કઝિન ઈશાન રોશનના એચઆરએક્સ સ્ટુડિયો દ્વારા એક ઓરિજિનલ ફિલ્મ તરીકે પ્રોડ્યુસ કરવામાં આવી છે. તેમાં કેટલાક લૂંટારુઓની વાત છે, જે ઓસીડી ધરાવતા એક માણસના ઘરમાં ઘૂસે છે અને પછી સમજે છે કે પરિવાર નથી, પરંતુ તે લોકો જ આ અણધાર્યું અને તીવ્ર ઓસીડી ધરાવતા માણસ સાથે આખી રાત ચાલનારી ટક્કરમાં બચવા માટે સંઘર્ષ કરી રહ્યા છે.’
તેણે પોતાની કારકિર્દી વિશે કહ્યું કે, ‘મારી સફર સતત શીખવાની પ્રક્રિયા છે અને આ તમામ પાત્રોએ મારામાં વ્યક્તિ તરીકે અને અભિનેતા તરીકે ખુબ મૂલ્ય ઉમેર્યું છે. હું પાત્ર સાથે સહાનુભૂતિ નહીં પરંતુ સહઅનુભૂતિ રાખવા ઇચ્છું છું અને લાગણીઓમાં મૂળ ધરાવતી માનવીય વાર્તાઓમાં કામ કરવા ઇચ્છું છું, જે વિવિધ રીતે કહી શકાય તેવી હોય. અત્યાર સુધીની મારી સફર ખૂબ સંતોષકારક રહી છે, કારણ કે હું મારી તમામ ફિલ્મોમાં વિવિધ શૈલીઓ અને અનોખા પાત્રોને શોધી શક્યો છું.’
તેણે વધુમાં જણાવ્યું કે, ‘મેં અત્યાર સુધી જેમ જેમ દિગ્દર્શકો અને પ્રોડ્યુસર્સ સાથે કામ કર્યું છે, તેમણે મને કોઈ એક ચોક્કસ પ્રકારમાં બાંધી દીધો નથી, તેના માટે હું ખરેખર ખુશ અને આભારી છું. તેમણે મને પોતાને આગળ ધપાવવાની, શોધખોળ કરવાની અને દર્શકોને વિવિધ લાગણીઓ અને પાત્રોની વિશાળ શ્રેણી રજૂ કરવાની તક આપી છે. હું તેમનો આભારી છે.’
