વર્લ્ડ બેન્કે તેના એક અહેવાલમાં ગયા સપ્તાહે જણાવ્યુ હતું કે, દુનિયામાં સૌથી વધુ રેમિટન્સ મેળવનારા ભારતને 2021માં 87 બિલિયન ડોલરનું રેમિટન્સ પ્રાપ્ત થયું છે, જેમાં અમેરિકાથી સૌથી વધારે નાણાં આવ્યા છે અને તેનો કુલ ભંડોળમાં 20 ટકાથી વધુ હિસ્સો છે.
વિશ્વમાં સૌથી વધુ રેમિટન્સ મેળવનાર દેશોની યાદીમાં ભારત પછી ચીન, મેક્સિકો, ફિલિપાઇન્સ અને ઇજિપ્તનો ક્રમે આવે છે. કોરોના મહામારી હોવા છતાં દેશમાં આવતો નાણાપ્રવાહ ઘટ્યો નથી. વર્લ્ડ બેન્કે જણાવ્યું હતું કે ઓછી અને મધ્યમ આવક ધરાવતા દેશોમાં વિદેશથી આવેલી રકમ 2021માં 7.3 ટકા વધીને 589 બિલિયન ડોલર સુધી પહોંચવાનો અંદાજ છે. ભારતમાં રેમિટન્સનો પ્રવાહ 2022માં ત્રણ ટકા વધીને 89.6 બિલિયન ડોલર થવાનો અંદાજ છે. 2020માં ભારતમાં 83 બિલિયન ડોલરનું રેમિટન્સ આવ્યું હતુ. વિદેશથી સૌથી વધારે નાણાં એટલે કે રેમિટન્સ મેળવવામાં ભારત પ્રથમ ક્રમે છે. આ વર્ષના બીજા ત્રિમાસિક ગાળામાં કોરોનાના રોગચાળાના બીજા મોજા અને ઉંચા મૃત્યુઆંક વચ્ચે પણ 4.6 ટકાની વૃદ્ધિ ઘણી મહત્વની છે.

એશિયાના સૌથી ધનવાન વ્યક્તિ તથા રિલાયન્સ ઈન્ડસ્ટ્રીઝના ચેરમેન મુકેશ અંબાણી પોતાના અંદાજે $208 બિલિયનના બિઝનેસ સામ્રાજ્યના ઉત્તરાધિકારી નિશ્ચિત કરવાની યોજના તૈયાર કરી રહ્યા હોવાનો તાજેતરમાં એક રિપોર્ટમાં દાવો કરવામાં આવ્યો છે. અહેવાલમાં સૂત્રોને ટાંકીને જણાવવામાં આવ્યું હતું કે 64 વર્ષના મુકેશ અંબાણી વિશ્વના ધનિક પરિવારોએ પોતાના સંતાનોમાં બિઝનેસની કરેલી વહેંચણીના મોડલનો અભ્યાસ કરી રહ્યાં છે.
અંબાણીને વોલ્ટમાર્કના વોટ્સન પરિવારનું મોડલ વધુ પસંદ આવ્યું હોવાનું માનવામાં આવે છે. મુકેશ અંબાણીને ત્રણ સંતાન છે. મુકેશ અંબાણીના પુત્ર આકાશ તથા પુત્રી ઈશા અંબાણી રિટેલ તથા ટેલિકોમ જેવી કંપનીઓના ડિરેક્ટર હોદ્દા સાથે સક્રિય ભૂમિકા ભજવી રહ્યા છે અને અનંત અંબાણી જિઓ પ્લેટફોર્મ્સમાં ડિરેક્ટર છે.

અદાણી ગ્રુપના ચેરમેન ગૌતમ અદાણી રિલાયન્સ ઈન્ડસ્ટ્રીઝના ચેરમેન મુકેશ અંબાણીને પાછળ છોડી એશિયાની સૌથી અમીર વ્યક્તિ બની ગયા છે. તેઓ ગ્રુપ માર્કેટ કેપના આધારે મુકેશ અંબાણીને પાછળ છોડતાં સૌથી અમીર વ્યક્તિ બની ગયા છે, એમ બુધવારે બ્લૂમબર્ગ બિલિયોનેર્સ ઇન્ડેક્સમાં જણાવાયું હતું.
રિલાયન્સ ઈન્ડસ્ટ્રીઝના ચેરમેન મુકેશ અંબાણી જૂન 2015થી સૌથી અમીર ભારતીયના પદ પર હતા. બુધવારે શેરબજારમાં અદાણી ગ્રુપના શેર્સમાં શાનદાર તેજી અને રિલાયન્સ ઈન્ડસ્ટ્રીઝના શેરમાં ઘટાડાને પગલે ગૌતમ અદાણી એશિયાના નંબર વન અમીર બની ગયા છે. અરામ્કોને સાથેનો 15 બિલિયન ડોલરનો સોદો રદ થયા પછી રિલાયન્સ ઇન્ડસ્ટ્રીઝના શેરમાં ભારે ધોવાણ થયું હતું અને તેનાથી તેમના શેરહોલ્ડિંગના વેલ્યુએશનમાં ઘટાડો થયો હતો.

ભારતીય રિઝર્વ બેન્કના ભૂતપૂર્વ ગવર્નર રઘુરામ રાજને બુધવારે જણાવ્યું હતું કે હાલ અસ્તિત્વ ધરાવતી મોટાભાગની ક્રિપ્ટોકરન્સી થોડા સમયમાં લુપ્ત થઈ જશે. રાજનનું માનવું છે કે, હાલ છ હજાર જેટલી ક્રિપ્ટોકરન્સી માર્કેટમાં છે, જેમાંથી માંડ એકાદ-બે જ પોતાનું અસ્તિત્વ જાળવી શકશે. એક ઈન્ટર્વ્યુમાં અર્થશાસ્ત્રી રાજને કહ્યું હતું કે કોઈ વસ્તુ માત્ર મોંઘી હોવાના કારણે જ તેનું મૂલ્ય વધારે હોય તો સમજી લેવું કે તેનો ફુગ્ગો ગમે ત્યારે ફુટી શકે છે. તેમણે એમ પણ કહ્યું હતું કે કેટલાક કોઈન્સ માત્ર એટલા માટે જ વેલ્યૂ ધરાવે છે કે કેટલાક મૂર્ખ તેમાં રોકાણ કરવા તૈયાર બેઠા હોય છે.
રઘુરામ રાજનનું કહેવું છે કે, ક્રિપ્ટોકરન્સી પણ ચીટ ફંડ્સ જેવી સમસ્યાઓ સર્જી શકે છે. ચીટ ફંડ્સ લોકો પાસેથી રુપિયા ઉઘરાવે છે અને એક દિવસ તેમનો ફુગ્ગો ફુટી જાય છે. ક્રિપ્ટો એસેટ્સ ધરાવતા ઘણા લોકો સરકારના આ વર્તનથી નારાજ હશે. તેમણે જણાવ્યું હતું કે મોટાભાગના ક્રિપ્ટોમાં કોઈ પરમેનન્ટ વેલ્યૂ નથી, પરંતુ કેટલીક ક્રિપ્ટોકરન્સી ક્રોસ-બોર્ડર પેમેન્ટને સરળ બનાવવાનો હેતુ સારી રીતે પૂરો પાડતી હોવાથી તે કદાચ ટકી જાય.

માધુરીની વેબસીરિઝનું શૂટિંગ ગુજરાતમાં

માધુરી દીક્ષિત તેની નવી વેબસીરિઝના શૂટિંગ માટે તાજેતરમાં ગુજરાતમાં હતી. તેણે અમદાવાદ અને પાવાગઢમાં ફેમિલી ડ્રામા વેબસીરિઝ ‘મેરે પાસ મા હૈ’નું શૂટિંગ કર્યું હતું. તેણે આ અંગે ઈન્સ્ટાગ્રામ પર એક વિડીયો શેર કર્યો છે. જેમાં તેની સામે ગુજરાતી વાનગીઓથી ભરેલી થાળી જોવા મળી રહી છે. માધુરીની થાળીમાં ગુજરાતી કઢી, કાલાજાંબુ, બટાકાનું શાક, દાળ, પાતરાં, અથાણું, પૂરી, રોટલી, ત્રિરંગી ઢોકળા, છાશ, દહીં, પાપડ, ઘારી અને અન્ય બે શાક જોવા મળી રહ્યા છે. માધુરીએ આ વીડીયો પોસ્ટ કરતાં જણાવ્યું હતું કે, ફૂડ=પ્રેમ. આ સાથે જ માધુરીએ ગુજરાતી થાળી, જ્યારે ગુજરાતમાં હોય ત્યારે અને પ્રેમ પ્રેમ છે જેવા હેશટેગ વાપર્યા છે.
ઉપરાંત ગુડ ફૂડ ઈઝ ગુડ મૂડ એટલે સારું ભોજન મૂડ સારો બનાવે છે તેમ કહ્યું છે. ખાવાની શોખીન માધુરી દીક્ષિત ‘મારું મન મોહી ગયું’ ગીત પર ડાન્સ કરતી પણ જોવા મળી રહી છે. માધુરીની પોસ્ટ જોતાં લાગી રહ્યું છે કે, વીડીયોમાં જોઈ શકો છો કે માધુરી દીક્ષિત બ્રાઉન રંગની પ્રિન્ટેડ સાડી અને બ્લૂ બ્લાઉઝમાં સુંદર લાગી રહી છે. માધુરી દીક્ષિત સોશિયલ મીડિયા પર ખાસ્સી એક્ટિવ રહે છે. ત્યારે પોતાની ડેઈલી લાઈફની ઝલક ફેન્સને બતાવતી રહી છે.

કરણની ફિલ્મમાં ફરાહખાનની કોરિયોગ્રાફી

બોલીવૂડનો જાણીતા ફિલ્મ મેકર કરણ જોહર ઘણા સમય પછી ફિલ્મ ડાયરેક્ટર તરીકે કામ કરી રહ્યા છે. તે ટૂંક સમયમાં જ ફિલ્મ ‘રોકી ઔર રાનીકી પ્રેમ કહાની’નું ડાયરેક્શન કરશે. હવે આ ફિલ્મ અંગે નવી માહિતી મળી રહી છે. કહેવાય છે કે કરણે ફિલ્મની કોરિયોગ્રાફીનું કામ ફરાહ ખાનને સોંપ્યું છે, તે ફિલ્મના ગીતો પર કોરિયોગ્રાફી કરશે. તે લગભગ નવ વર્ષ પછી કરણ સાથે કામ કરી રહી છે.
આ અંગે ફરાહ ખાને જણાવ્યું હતું કે, અમે છેલ્લે 2012માં ‘સ્ટુડન્ટ ઓફ ધ યર’ ફિલ્મમાં સાથે કામ કર્યું હતું. હું કોરિયોગ્રાફીના ગીતો માટે બહુ ચૂઝી રહી છું. પરંતુ ઘણા સંબંધો ખાસ હોવાથી તેના માટે કામ કરવાની પદ્ધતિઓમાં બાંધછોડ કરવી પડતી હોય છે. કરણ અને મારા સંબંધો વિશેષ છે. તેથી હું ફરી તેની સાથે કામ કરવા માટે ઉત્સાહિત છું.

જ્હાનવી-રાજકુમારની નવી ફિલ્મ

હોરર કોમેડી ફિલ્મ ‘રૂહી’ બાદ રાજકુમાર રાવ અને જ્હાનવી કપૂર ટૂંક સમયમાં પડદા પર સાથે જોવા મળશે. આ ફિલ્મનું નામ ‘મિસ્ટર એન્ડ મિસિસ માહી’ છે. કરણ જોહરે આ ફિલ્મની જાહેરાત સોશિયલ મીડિયા પર કરી હતી. કરણ જોહરે ફિલ્મની જાહેરાત કરતો એક નાનો વીડિયો પોસ્ટ કર્યો છે. આ વીડિયોમાં રાજકુમાર રાવ અને જ્હાનવી કપૂર દેખાતા નથી પરંતુ બેકગ્રાઉન્ડમાં બંનેનો અવાજ સંભળાય છે. જેમાં બંને કહી રહ્યા છે- ‘ક્યારેક સપના પૂરા કરવા માટે બે લોકોની જરૂર પડે છે.’
આ ફિલ્મની જાહેરાત કરતા કરણ જોહરે ઈન્સ્ટાગ્રામ પર કેપ્શન લખ્યું – ‘એક સપનું બે દિલે જોયું. પ્રસ્તુત છે ‘મિસ્ટર એન્ડ મિસિસ માહી’. ડાયરેક્ટર શરણ શર્મા ફરી એકવાર તમારી સામે બે દિલની વાર્તા લાવી રહ્યા છે.

અભિષેક બચ્ચનની નવી ફિલ્મ સ્ટ્રીમિંગ પ્લેટફોર્મ પર રીલીઝ થશે

અભિષેક બચ્ચનની નવી ફિલ્મ ‘બોબ બિશ્વાસ’ને રીલીઝ કરવાની તારીખ છેવટે નક્કી કરવામાં આવી છે. દિયા અન્નપૂર્ણા ઘોષના સૌપ્રથમ ડાયરેક્શન અને ગૌરી ખાન તેમ જ અન્ય નિર્માતાઓના દ્વારા નિર્મિત આ ફિલ્મ 3ડિસેમ્બરે સ્ટ્રીમિંગ પ્લેટફોર્મ પર રીલિઝ થશે એવી જાહેરાત કરવામાં આવી હતી.
સૂત્રોએ જણાવ્યું હતું કે આ ફિલ્મ વર્ષ 2012માં આવેલી સુજોય ઘોષની ‘કહાની’ના આઇકોનિક પાત્રની તે નામ સાથે જ સંકળાયેલી છે.