સતત નવ ફાઇનલથી અજેય રહેલા નોવાક યોકોવિચની વિજયયાત્રા થંભાવીને રવિવારે ઓસ્ટ્રેલિયન ઓપન ગ્રાન્ડસ્લેમ ટેનિસ ટુર્નામેન્ટમાં સ્પેનના કાર્લોસ અલ્કારાઝે સૌથી યુવા વયના ચેમ્પિયન તરીકેનો રેકોર્ડ પણ કર્યો હતો. 22 વર્ષથી થોડી વધુ વયે કાર્લોસે સૌથી નાની વયે ચારેય ગ્રાન્ડસ્લેમના તાજની સિદ્ધિ પણ હાંસલ કરી છે. મહિલા સિંગલ્સમાં શનિવારે કઝાખસ્તાનની એલિના રાયબાકિના ચેમ્પિયન બની હતી.
પુરૂષોની સિંગલ્સમાં સર્બીઆનો યોકોવિચ મેલબોર્નમાં સતત નવ વર્ષ ફાઈનલમાં પહોંચ્યા પછી હાર્યો નહોતો, પણ રવિવારે એ સિલસિલા તૂટી ગયો હતો.
24 ગ્રાંડ સ્લેમ વિજેતા રહી ચૂકેલો યોકોવિચ ભાગ્યે જ ચોથી ગેમ સુધીમાં પરાજિત થયો છે, પણ રવિવારે કાર્લોસે તે સિદ્ધિ પણ નોંધાવી હતી. તે 2-6, 6-2, 6-3, 7-5થી વિજેતા રહ્યો હતો. યોકોવિચ માટે પોતાના 25મા ગ્રાંડ સ્લેમ ટાઈટલનો ઈંતજાર પણ લંબાઈ રહ્યો છે, છેલ્લે સતત 9 ફાઈનલ પછી પણ તેને હજી 25મું ટાઈટલ મળ્યું નથી.
મહિલા સિંગલ્સમાં રાયબાકિનાએ ટોપ સીડ બેલારુસિયન હરીફ આર્યના સબાલેન્કાને 6-4, 4-6, 6-4 થી હરાવી હતી. ઓસ્ટ્રેલિયન ઓપન ટેનિસમાં મહિલા સિંગલ્સનો તાજ હાંસલ કરનારી રાયબાકિના કઝાકિસ્તાનની પ્રથમ મહિલા ખેલાડી બની છે. 26 વર્ષ ચેમ્પિયન માટે ગ્રાન્ડ સ્લેમનો એ પહેલો તાજ છે. ત્રણ વર્ષ પહેલા ફાઇનલમાં તેનો સબાલેન્કા સામે પરાજય થયો હતો.
પુરૂષોની ડબલ્સમાં બ્રિટનના નીલ સ્કપસ્કી અને અમેરિકાના ક્રિશ્ચિયન હેરિસને ઓસ્ટ્રેલિયાની વાઈલ્ડ કાર્ડ એન્ટ્રીની જોડી જેસન કુબ્લર અને માર્ક પોલમેન્સને 76- (4), 6-4થી હરાવી ટાઈટલ મેળવ્યું હતું, તો ઓસ્ટ્રેલિયાના જોન પીયર્સ અને ઓલિવિઆ ગેડેકી મિક્સ્ડ ડબલ્સમાં ચેમ્પિયન રહ્યા હતા. મહિલા ડબલ્સમાં બેલ્જિયમની એલિસ મેર્ટેન્સ અને ચીનની ઝાંગ શુએઈએ જોડી તરીકે પોતાનું પ્રથમ ગ્રાંડ સ્લેમ ટાઈટલ હાંસલ કર્યું હતું.
