ભારતના વડાપ્રધાન નરેન્દ્ર મોદી સાથે ફોન પર વાતચીત પછી અમેરિકાના પ્રેસિડન્ટ ડોનાલ્ડ ટ્રમ્પે સોમવાર, 2 ફેબ્રુઆરીની રાત્રે ભારત સાથે ટ્રેડ ડીલની જાહેરાત કરી હતી. આ ડીલ મુજબ અમેરિકા ભારતીય માલ પરની ટેરિફને 50 ટકાથી ઘટાડી 18 ટકા કરશે. વડાપ્રધાન મોદીએ પણ જાહેરાત કરી હતી કે મેડ-ઇન-ઇન્ડિયા પ્રોડક્ટ્સ પર હવે અમેરિકામાં 18 ટકાની ટેરિફ લાગશે. બંને દેશો વચ્ચે ટ્રેડ ડીલની જાહેરાતના બીજા દિવસે મંગળવારે સવારે ભારતીય શેરબજાર અને રૂપિયામાં અભૂતપૂર્વ તેજી આવી હતી.
મોદીએ જણાવ્યું હતું કે આજે મારા પ્રિય મિત્ર પ્રેસિડન્ટ ટ્રમ્પ સાથે વાતચીત કરીને મને ખૂબ આનંદ થયો. મને ખુશી છે કે મેડ ઇન ઇન્ડિયા પ્રોડક્ટ્સ પર હવે 18 ટકાનો ટેરિફ હશે. આ અદભૂત જાહેરાત માટે ભારતના 1.4 અબજ લોકો વતી પ્રેસિડન્ટ ટ્રમ્પનો ખૂબ ખૂબ આભાર.બે મોટી અર્થવ્યવસ્થાઓ અને વિશ્વની સૌથી મોટી લોકશાહીઓ સાથે મળીને કામ કરે છે, ત્યારે લોકોને લાભ થાય છે અને પરસ્પર ફાયદાકારક સહયોગ માટે અપાર તકો ખુલે છે. પ્રેસિડન્ટ ટ્રમ્પનું નેતૃત્વ વૈશ્વિક શાંતિ, સ્થિરતા અને સમૃદ્ધિ માટે મહત્વપૂર્ણ છે. ભારત શાંતિ માટેના તેમના પ્રયાસોને સંપૂર્ણ સમર્થન આપે છે.
ટ્રમ્પે જણાવ્યું હતું કે ભારત અમેરિકા સામે “ટેરિફ અને નોનટેરિફ અવરોધો” શૂન્ય કરવા માટે આગળ વધશે. નવી દિલ્હી 500 અબજ ડોલરથી વધુ મૂલ્યના ઊર્જા સહિત અમેરિકન માલ ખરીદશે.વડાપ્રધાન મોદી સાથે મિત્રતા અને આદરના કારણે અને તેમની વિનંતી મુજબ, તાત્કાલિક અસરથી અમે અમેરિકા અને ભારત વચ્ચે વેપાર કરાર પર સંમત થયા છીએ, જેમાં અમેરિકા 25 ટકાની જગ્યાએ 18 ટકા પારસ્પરિક ટેરિફ વસૂલશે. ભારત પણ અમેરિકા સામેના તેમના ટેરિફ અને નોન-ટેરિફ અવરોધોને શૂન્ય કરવા માટે આગળ વધશે.
ટ્રમ્પે કહ્યું હતુ કે મોદીએ 500 અબજ ડોલરથી વધુના અમેરિકી ઊર્જા, ટેકનોલોજી, કૃષિ, કોલસો અને અન્ય ઘણી પ્રોડક્ટ્સ ઉપરાંત ઘણા ઊંચા સ્તરે અમેરિકન માલ ખરીદવા માટે પણ પ્રતિબદ્ધતા વ્યક્ત કરી છે. ભારત સાથેના અમારા અદભૂત સંબંધો ભવિષ્યમાં વધુ મજબૂત બનશે. મોદી અને તેમણે રશિયા-યુક્રેન યુદ્ધને સમાપ્ત કરવા માટે ચર્ચાવિચારણા કરી છે. મોદી રશિયન ક્રૂડ ઓઇલ ખરીદવાનું બંધ કરવા અને અમેરિકા અને સંભવતઃ વેનેઝુએલા પાસેથી ઘણું બધું ઓઇલ ખરીદવા સંમત થયાં છે. તેનાથી યુક્રેન યુદ્ધને સમાપ્ત કરવામાં મદદ મળશે.
ભારત સામેની અમેરિકાની આ ટેરિફ હવે સ્પર્ધક દેશો કરતા નીચી થઈ છે. ઇન્ડોનેશિયા પર ૧૯ ટકા, વિયેતનામ પર ૨૦ટકા, બાંગ્લાદેશ પર ૨૦ ટકા અને ચીન પર ૩૪ ટકા અમેરિકન ટેરિફ છે.
વ્હાઇટ હાઉસના એક અધિકારીએ રોઇટર્સને જણાવ્યું હતું કે અમેરિકા 25% “પારસ્પરિક” ટેરિફ દર ઉપરાંત રશિયન તેલની ખરીદી પર ભારતથી થતી તમામ આયાત પર 25% દંડાત્મક ડ્યુટી રદ કરી રહ્યું છે.
આ સમાચારને કારણે યુ.એસ.માં લિસ્ટેડ મુખ્ય ભારતીય કંપનીઓના શેરમાં તેજી જોવા મળી હતી. IT કન્સલ્ટિંગ ફર્મ ઇન્ફોસિસમાં 4.3%, વિપ્રોમાં 6.8%, HDFC બેંક 4.4% ઉછાળો આવ્યો હતો. ડીલની જાહેરાત પછી મંગળવાર, 3 ફેબ્રુઆરીએ ભારતીય શેરબજારોમાં આશરે 5 ટકાનો જંગી ઉછાળો આવ્યો હતો.
