અમેરિકન પ્રેસિડેન્ટ ડોનાલ્ડ ટ્રમ્પે શુક્રવારે ભારત સાથે સહયોગ વધારવા સંલગ્ન રાષ્ટ્રીય રક્ષા નીતિ બિલ પર સહિ કરી હતી. આ બિલમાં ભારત સાથે ગાઢ લશ્કરી અને વ્યૂહાત્મક સહયોગ વધારવાને પ્રાથમિકતા આપવાનો ઉલ્લેખ છે. સાથે જ ક્વોડની મદદથી ચીન સામેના ખતરાનો સામનો કરવા સહયોગને વધુ મજબૂત બનાવવા પર ભાર અપાશે. ક્વોડના માધ્યમથી ઈન્ડો-પેસિફિક ક્ષેત્રને સ્વતંત્ર અને ખુલી રીતે સુરક્ષિત કરવા પર ધ્યાન આપવામાં આવશે. આ બિલમાં જણાવાયું છે કે, વિદેશ સચિવે અમેરિકા-ભારત વ્યૂહાત્મક સુરક્ષા સંવાદ અંતર્ગત ભારત સરકાર સાથે પરમાણુ અંગેના નિયમો મુદ્દે એક સંયુક્ત સલાહકાર તંત્ર સ્થાપિત કરવું પડશે. આ તંત્રના માધ્યમથી બન્ને દેશો નિયમિત મુલાકાત કરીને 2008માં થયેલી શાંતિપૂર્ણ પરમાણુ ઊર્જા ઉપયોગ સમજૂતિના અમલીકરણનું મૂલ્યાંકન કરશે અને ભારતના સ્થાનિક પરમાણુ નિયમોને આંતરરાષ્ટ્રીય ધોરણો અનુરૂપ લાવવાની તક પર ચર્ચા કરશે. બિલમાં જણાવાયું છે કે, રક્ષા તથા વિદેશ સચિવે મળીને રક્ષા ઔદ્યોગિક પાયાને મજબૂત કરવા વ્યૂહરચના તૈયાર કરવી પડશે. ઓસ્ટ્રેલિયા, જાપાન, સાઉથ કોરિયા, ફિલિપાઈન્સ, ન્યૂઝીલેન્ડ વગેરે સહયોગી દેશોને સુરક્ષા માટેની પહેલમાં સામેલ કરવા આમંત્રિત કરાશે. આ બિલના અમલથી 180 દિવસની અંદર તથા ત્યારબાદ પાંચ વર્ષ સુધી પ્રતિ વર્ષ સંયુક્ત રિપોર્ટ પણ પ્રસિદ્ધ કરાશે.
