ઈન્ડિગો, ડેલ્ટા એર લાઈન્સ, એર ફ્રાન્સ-કેએલએમ અને વર્જિન એટલાન્ટિકે રવિવારે ભારતથી યુરોપ તેમજ ઉત્તર અમેરિકા સાથે એર કનેક્ટિવિટી વધારવા માટે ભાગીદારીની જાહેરાત કરી હતી.
પ્રેસ રીલીઝમાં જણાવાયું હતું કે યુએસ, કેનેડા, યુરોપ અને ભારતના ડઝનબંધ શહેરોને એર કનેક્ટિવિટી પૂરી પાડવાના ઉદ્દેશ્ય સાથે આ એરલાઇન્સ આંતરરાષ્ટ્રીય મુસાફરીની વધતી માંગને પહોંચી વળવા માગે છે. આ ભાગીદારીનો ઉદ્દેશ વૈશ્વિક ઉડ્ડયનમાં કનેક્ટિવિટી અને સહયોગ માટે નવા ધોરણો સ્થાપિત કરવાનો છે.
ભારતની સૌથી મોટી એરલાઇન, ઇન્ડિગો, તેના આંતરરાષ્ટ્રીય નેટવર્કનું વિસ્તરણ કરી રહી છે અને માર્ચ 2026માં પૂરા થતા ચાલુ નાણાકીય વર્ષમાં 10 વિદેશી શહેરોમાં ફ્લાઇટ્સ શરૂ કરવા માટે તૈયાર છે.
ભારતની રાષ્ટ્રીય રાજધાની દિલ્હીમાં ઇન્ડિગોના સીઈઓ પીટર એલ્બર્સ, ડેલ્ટા એર લાઇન્સના સીઈઓ એડ બાસ્ટિયન, એર ફ્રાન્સ-કેએલએમના સીઈઓ બેન્જામિન સ્મિથ અને વર્જિન એટલાન્ટિકના સીઈઓ શાઈ વેઇસએ સંયુક્ત રીતે આ ભાગીદારીની જાહેરાત કરી હતી. ઇન્ડિગો 2022થી એર ફ્રાન્સ-કેએલએમ અને વર્જિન એટલાન્ટિક સાથે ભાગીદારી ધરાવે છે.
ડેલ્ટા એર લાઇન્સના સીઈઓ એડ બાસ્ટિયનએ જણાવ્યું હતું કે કેરિયર આગામી વર્ષોમાં ભારત માટે ફ્લાઇટ્સ ફરી શરૂ કરશે. તે એટલાન્ટા અને દિલ્હી વચ્ચે સીધી ફ્લાઇટ્સ સાથે ભારતમાં સેવાઓ ફરી શરૂ કરવાની યોજના ધરાવે છે, જે સરકારની મંજૂરીને આધીન છે.
