કેનેડાના બ્રિટિશ કોલંબિયામાં બુધવારે એક શાળામાં થયેલા આડેધડ ફાયરિંગમાં હુમલાખોર સહિત દસ લોકોના મોત થયાં હતાં અને ઓછામાં ઓછા 25 લોકો ઘાયલ થયાં હતાં.
રોયલ કેનેડિયન માઉન્ટેડ પોલીસ (RCMP)એ જણાવ્યું હતું કે શંકાસ્પદની ઓળખ ભૂરા વાળવાળા મહિલાના ડ્રેસમાં રહેલી એક વ્યક્તિ તરીકે થઈ હતી. શંકમંદ વ્યક્તિ શાળાના પરિસરમાં મૃત હાલતમાં મળી આવી હતી અને માનવામાં આવે છે કે તેને પોતે જ ઈજા પહોંચાડી હતી. શાળામાં છ લોકો મૃત હાલતમાં મળી આવ્યાં હતાં, એકનું હોસ્પિટલ લઈ જતા રસ્તામાં મૃત્યુ થયું હતું અને બે લોકો સમુદાયના એક રહેઠાણમાંથી મૃત હાલતમાં મળી આવ્યા હતાં. ગંભીર અથવા જીવલેણ ઇજાઓ ધરાવતા બે લોકોને એરલિફ્ટ કરી હોસ્પિટલમાં ખસેડવામાં આવ્યાં હતાં.
ગ્લોબ એન્ડ મેઇલના અહેવાલ મુજબ, ટમ્બલર રિજ સેકન્ડરી સ્કૂલમાં સ્થાનિક સમય મુજબ બપોરે 1.20 વાગ્યે બનેલી આ ઘટના બાદ ટમ્બલર રિજ પોલીસે બપોરે 2 વાગ્યાનું એલર્ટ જારી કર્યું હતું, રહેવાસીઓને ઘરમાં આશ્રય લેવા, દરવાજા બંધ કરવા અને બહાર જવાનું ટાળવા કહેવામાં આવ્યું હતું.
લગભગ 2,400 લોકોની વસ્તી ધરાવતા ટમ્બલર રિજ શહેરમાં પડોશી વિસ્તારોમાંથી વધારાના પોલીસ દળો તૈનાત કરાયા હતાં. આ અઠવાડિયે શાળા બંધ રહેશે.
RCMPના નોર્થ ડિસ્ટ્રિક્ટ ચીફ સુપરિન્ટેન્ડેન્ટ કેન ફ્લોયડે જણાવ્યું હતું કે સ્ટાફ અને વિદ્યાર્થીઓ સહિત લગભગ 100 લોકોને શાળામાંથી સુરક્ષિત રીતે બહાર કાઢવામાં આવ્યા હતાં. પોલીસ હજુ સુધી સમજી શકી નથી કે ગોળીબારનું કારણ શું હતું. કેનેડાના વડાપ્રધાન માર્ક કાર્નેએ સોશિયલ મીડિયા પર એક નિવેદનમાં જણાવ્યું હતું કે ટમ્બલર રિજમાં થયેલા ગોળીબારથી તેઓ ખૂબ જ દુઃખી છે. જે લોકોના જીવનમાં આજે બદલી ન શકાય તેવી રીતે પરિવર્તન આવ્યું છે તેમના શોકમાં હું કેનેડિયનો સાથે જોડાઉ છું, અને પોતાના સાથી નાગરિકોનું રક્ષણ કરવા માટે પોતાનો જીવ જોખમમાં મૂકનારા પ્રથમ પ્રતિભાવ આપનારાઓની હિંમત અને નિઃસ્વાર્થતા માટે કૃતજ્ઞતા વ્યક્ત કરું છું.
