ભારતીય ક્રિકેટ કંટ્રોલ બોર્ડે 2025-2026 માટે ખેલાડીઓના સેન્ટ્રલ કોન્ટ્રાક્ટની જાહેરાત સોમવારે (9 ફેબ્રુઆરીએ) કરી હતી. ભારતના ભૂતપૂર્વ સુકાની રોહિત શર્મા અને વિરાટ કોહલીને ગ્રેડ-Aમાંથી નીચે ઉતારી ગ્રેડ-Bમાં સામેલ કરાયા છે. ગ્રેડ-Aમાં ફક્ત ત્રણ ખેલાડીઓ, ગ્રેડ-Bમાં 11 અને ગ્રેડ-Cમાં 16 ખેલાડીઓને સામેલ કર્યા છે. તો મોહમદ શમી, ઈશાન કિશન, મુકેશ કુમાર, સરફરાઝ ખાન તથા રજત પાટીદારની સદંતર અવગણના કરાઈ છે.
પુરુષ ટીમના વાર્ષિક કોન્ટ્રાક્ટમાં ગ્રેડ-એમાં શુભમન ગિલ, જસપ્રીત બુમરાહ અને રવીન્દ્ર જાડેજાનો સમાવેશ કરાયો છે. વાર્ષિક સેન્ટ્રલ કોન્ટ્રાક્ટમાં 30 પુરુષ ખેલાડી અને 21 મહિલા ખેલાડીઓનો સમાવેશ કરાયો છે.
રોહિત શર્મા અને વિરાટ કોહલી ટેસ્ટ ક્રિકેટ તથા ટી-20 ઈન્ટરનેશનલમાંથી નિવૃત્તિ જાહેર કરી ચૂક્યા છે. કોન્ટ્રાક્ટમાં સામેલ અન્ય ખેલાડીઓની યાદી આ મુજબ છેઃ
ગ્રેડ B – વોશિંગ્ટન સુંદર, રોહિત શર્મા, વિરાટ કોહલી, કે. એલ. રાહુલ, મોહમ્મદ સિરાજ, હાર્દિક પંડ્યા, ઋષભ પંત, કુલદીપ યાદવ, યશસ્વી જયસ્વાલ, સૂર્યકુમાર યાદવ અને શ્રેયસ ઐય્યર.
ગ્રેડ C – અક્ષર પટેલ, તિલક વર્મા, રીંકુ સિંહ, શિવમ દુબે, સંજુ સેમસન, અર્શદીપ સિંહ, પ્રસિદ્ધ કૃષ્ણા, આકાશ દીપ, ધ્રુવ જુરેલ, હર્ષિત રાણા, વરુણ ચક્રવર્તી, નીતિશ કુમાર રેડ્ડી, અભિષેક શર્મા, સાઈ સુદર્શન, રવિ બિશ્નોઈ અને ઋતુરાજ ગાયકવાડ.
