ઉત્તરપ્રદેશની એક કોર્ટે બે બ્રિટિશ નાગરિકોને નેપાળથી ગેરકાયદેસર રીતે ભારતમાં પ્રવેશ કરવા બદલ છ મહિનાની જેલની સજા અને રૂ.50,000નો દંડ ફટકાર્યો હતો. જો દંડ ભરવામાં નિષ્ફળ જશે તો તેમને ત્રણ મહિનાની વધારાની કેદની સજા ભોગવવી પડશે.
જોકે સજા જાહેર થયા પછી કોર્ટે તેમને એ શરતે જામીન આપ્યા હતા કે અપીલના સમયગાળા દરમિયાન તેઓ દેશ છોડીને ભાગી નહીં જાય. ફરિયાદ પક્ષના અધિકારી નિર્મલ યાદવના જણાવ્યા અનુસાર, હસન અમ્માન સલીમ (35) અને સુમિત્રા શકીલ ઓલિવિયા (61) નામના બે વ્યક્તિઓની ગયા વર્ષે નવેમ્બરમાં ભારત-નેપાળ સરહદ પરથી માન્ય દસ્તાવેજો વિના ભારતમાં પ્રવેશવા બદલ ધરપકડ કરાઈ હતી.
મૂળ પાકિસ્તાનના ગુજરાંવાલાનો સલીમ યુનાઇટેડ કિંગડમના માન્ચેસ્ટરનો રહેવાસી છે અને ડી મોન્ટફોર્ટ યુનિવર્સિટીમાં ઑડિયોલોજીમાં લેક્ચરર તરીકે કામ કરે છે.
મૂળ કર્ણાટકના ઉડુપીની રહેવાસી ઓલિવિયા બ્રિટિશ નાગરિકતા ધરાવતા છે અને અને તે ગ્લુસેસ્ટરમાં રહે છે. તેણી પાસે બ્રિટિશ પાસપોર્ટ તેમજ ઓવરસીઝ સિટીઝન ઓફ ઈન્ડિયા (OCI) કાર્ડ છે.
અધિકારીએ જણાવ્યું હતું કે બંને નવેમ્બર 2025માં નેપાળગંજની એક મેડિકલ કોલેજમાં શ્રવણશક્તિ ગુમાવનારા બાળકો માટેના ચેરિટી કાર્યક્રમમાં ભાગ લેવા માટે યુકેથી નેપાળ ગયા હતા. તેમની પાસે માન્ય નેપાળ વિઝા હતા.તેમણે 15 નવેમ્બર 2025ના રોજ ભારતમાં પ્રવેશ કરવાનો પ્રયાસો કર્યો હતો. તે સમયે સત્તાવાળાએ ઇમિગ્રેશન એન્ડ ફોરેનર્સ એક્ટ હેઠળ ધરપકડ કરી હતી.
