કેલિફોર્નિયાના એક બેન્ક્વેટ હોલમાં શનિવારે રાત્રે એક પરિવારની બર્થ-ડે પાર્ટીમાં થયેલા અંધાધુંધ ફાયરિંગમાં ચાર લોકોના મોત થયા હતાં અને 10 ઘાયલ થયા હતાં. ઘાયલોને હોસ્પિટલમાં દાખલ કરાયા હતાં. સ્ટોકટન શહેરના લુસીલ એવન્યુના 1900 બ્લોક પરના સ્થળે સાંજે 6 વાગ્યા પહેલા ગોળીબાર શરૂ થયો હતો.
મૃતકોમાં બે બાળકોનો સમાવેશ થાય છે. સેન જાઓકિન કાઉન્ટી શેરીફે જણાવ્યું હતું કે ગોળીબારમાં બે બાળકો સહિત કુલ ચાર લોકોના મોત થયા છે. પ્રાથમિક તપાસના આધારે પોલીસને આશંકા છે કે આ લોકોને નિશાનો બનાવીને હત્યા કરાઈ છે. સ્ટોકટનના ડેપ્યુટી મેયર જેસન લીએ સમગ્ર મામલે શોક વ્યક્ત કરીને જણાવ્યું છે કે તેઓ સતત ઉચ્ચ અધિકારીઓ સાથે સંપર્કમાં છે. પોલીસ ઘટનાસ્થળના રસ્તા પર લોકોની અવરજવર બંધ કરી છે.
ગયા મહિને જ અમેરિકાના મિસિસિપીમાં ડેલ્ટા વિસ્તારમાં ગોળીબાર થયો હતો. બે અલગ અલગ સ્થળો પર થયેલા ગોળીબારમાં છ લોકોએ જીવ ગુમાવ્યા હતા જ્યારે 12 ઈજાગ્રસ્ત થયા હતા. લીલેન્ડ નામના શહેરમાં હાઈસ્કૂલમાં ફૂટબોલ હોમકમિંગ ગેમ બાદ ગોળીબાર થયો હતો જેમાં ચારના મોત થયા હતા. જ્યારે બીજી ઘટના હાઈડલબર્ગ નામના શહેરમાં થઈ હતી. જેમાં હાઈસ્કૂલ હોમકમિંગ વીકેન્ડમાં શાળા પરિસરમાં જ ગોળીબાર થતાં બેના મોત થયા હતા.
