ભારતના વિવિધ શહેરો પર પાકિસ્તાનના નિષ્ફળ હુમલા વચ્ચે ગુરુવારે ગુજરાતના દરિયાકાંઠે સુરક્ષામાં વધારો કરાયો હતો અને સરકારે પોલીસ કર્મચારીઓની રજાઓ રદ કરી હતી. રજા પરના કર્મચારીઓને તાત્કાલિક ફરજ પર પાછા ફરવાનો આદેશ અપાયો હતો. ગુજરાત પાકિસ્તાન સાથે જમીન અને દરિયાઈ સરહદોથી જોડાયેલું છે. ‘ઓપરેશન સિંદૂર’ને પગલે સરકારે આ નિર્ણય કર્યો હતો.
ગુરુવારે રાત્રે ગુજરાતના કચ્છ અને બનાસકાંઠાના સરહદી જિલ્લાઓના ઘણા ભાગોમાં 7 કલાકથી વધુ સમય માટે સંપૂર્ણ બ્લેકઆઉટ લાગુ કરાયો હતો. અધિકારીઓએ પુષ્ટિ આપી હતી કે પાકિસ્તાનના કોઈપણ આક્રમક પગલાને રોકવા માટે સાવચેતીના પગલા તરીકે ભુજ, નલિયા, નખત્રાણા અને ગાંધીધામ શહેરો સહિત કચ્છના ઘણા ભાગોને સંપૂર્ણ બ્લેકઆઉટ કરવામાં આવ્યા હતા.ગુરુવારે રાત્રે ૧૦ વાગ્યાની આસપાસ લાઇટો બંધ થઈ ગઈ હતી અને શુક્રવારે સવારે ૫.૩૦ વાગ્યા પછી વીજળી પાછી આવી હતી. તેવી જ રીતે, બનાસકાંઠા જિલ્લામાં સુઇગામ અને તેની આસપાસના 20 ગામોમાં વીજળી ગુલ કરવામાં આવી હતી
રાજ્યના પોલીસ મહાનિર્દેશક વિકાસ સહાયની કચેરીએ બુધવારે રાત્રે શહેરો અને જિલ્લાઓના તમામ પોલીસ અધિકારીઓની રજાઓ “અણધારી પરિસ્થિતિને કારણે” રદ કરવાનો આદેશ જારી કર્યો હતો અને તેમને તાત્કાલિક અસરથી ફરજ પર પાછા ફરવા જણાવ્યું હતું.રાજકોટ રેન્જના ઇન્સ્પેક્ટર જનરલ અશોક કુમાર યાદવે જણાવ્યું હતું કે પાકિસ્તાનમાં ભારતના આતંકવાદ વિરોધી હુમલા બાદ દરિયાકાંઠે પોલીસને “એલર્ટ” મોડ પર રાખવામાં આવી છે. રાજકોટ રેન્જ હેઠળના પાંચ જિલ્લાઓમાંથી જામનગર, મોરબી અને દેવભૂમિ દ્વારકા પાસે દરિયાકિનારો છે.
યાદવે જણાવ્યું હતું કે, “અમે છેલ્લા બે દિવસમાં ગુજરાતના દરિયાકાંઠાના પટ્ટામાં સુરક્ષા વધારી દીધી છે, અને તે પ્રદેશમાં મહત્તમ પોલીસ દળ તૈનાત કરવામાં આવ્યું છે. પોલીસને એલર્ટ મોડ પર રાખવામાં આવી છે અને તમામ પોલીસ અધિકારીઓની રજાઓ પણ રદ કરવામાં આવી છે.તેમણે ઉમેર્યું કે પોલીસકર્મીઓ દરિયાકાંઠાના ગામડાઓ અને “બોટ લેન્ડિંગ પોઈન્ટ” ની મુલાકાત લઈ રહ્યા છે અને ગ્રામજનો અને સરપંચોને વિનંતી કરી રહ્યા છે કે જો તેઓ કોઈ શંકાસ્પદ ગતિવિધિ જુએ તો પોલીસને જાણ કરે.તેમના અધિકારક્ષેત્ર હેઠળના જિલ્લાઓમાં વિવિધ મહત્વપૂર્ણ સ્થાપનો પર સુરક્ષા પણ વધારી દેવામાં આવી છે
