બોલીવૂડ છોડીને હોલીવૂડમાં સ્થાયી થયેલી પ્રિયંકા ચોપરા અત્યારે સાઉથના ફિલ્મકાર મહેશ બાબુ સાથેની તેની ફિલ્મનાં શૂટિંગમાં વ્યસ્ત છે. આ ફિલ્મનું નામ અત્યારે SSMB29 જાહેર કરાયું છે. એસએસ રાજામૌલીના દિગ્દર્શનની આ ફિલ્મનું શૂટિંગ અત્યાર સુધીમાં હૈદરાબાદ, ઓડિશા અને ભારતના અન્ય સ્થળોએ થયું છે. હવે, આ તેની શૂટિંગ ટીમ નૈરોબી પહોંચી ગઈ છે. પ્રિયંકા ચોપરાએ તાજેતરમાં નૈરોબીના મસાઈમારાની મુલાકાત લીધાં પછી તેની ઇન્સ્ટાગ્રામ સ્ટોરી પર એક વીડિયો શેર કર્યો છે. કારમાં બેસીને તે જંગલમાં સવારી કરતી જોવા મળે છે. તે ઘાસનાં ખેતરો, જંગલી પ્રાણીઓ વગેરે સહિત પ્રકૃતિને માણતી હોય તેવું જોવા મળે છે.
આ વિડીયોમાં, પ્રિયંકા ચોપરા કહેતી સંભળાય છે, ‘હવા તાજી છે. તે સુંદર છે.’ પ્રિયંકા ચોપરા થોડા દિવસો પહેલાં SSMB29ના શૂટિંગ માટે હૈદરાબાદમાં હતી. તેણે તેની પુત્રી માલતી મેરી જોનાસ સાથે હૈદરાબાદની મુલાકાતની કેટલીક ઝલક પણ શેર કરી હતી. ચાહકો SSMB29ની આતુરતાથી રાહ જોઈ રહ્યા છે. મહેશ બાબુના જન્મદિવસ પર, નિર્માતાઓએ પ્રોડ્યુસર એસએસ રાજામૌલી વતી એક નિવેદન પોસ્ટ કર્યું હતું. આ નિવેદનમાં, તેમણે કહ્યું હતું, ‘ભારત અને વિશ્વભરના પ્રિય સિનેમા પ્રેમીઓ, તેમજ મહેશના ચાહકો, અમને શૂટિંગ શરૂ કર્યાને ઘણો સમય થઈ ગયો છે, અમે ફિલ્મ વિશે જાણવાની તમારી ઉત્સુકતાની પ્રશંસા કરીએ છીએ. જો કે, આ ફિલ્મની વાર્તા અને ફલક એટલો વિશાળ છે કે મને લાગે છે કે ફક્ત તસવીરો અથવા મીડિયા તેને ન્યાય આપી શકશે નહીં. અમે હાલમાં અમે જે દુનિયા બનાવી રહ્યા છીએ તેને વાસ્તવિક બનાવવા માટે અમે કંઇક કામ કરી રહ્યા છીએ. નવેમ્બર 2025માં તેની જાહેરાત કરવામાં આવશે, અમે તેને ક્યારેય ન જોયેલી ફિલ્મ બનાવવાનો પ્રયાસ કરી રહ્યા છીએ. તમારા બધાની ધીરજ બદલ આભાર.’
