મહેશ ભટ્ટની પુત્રી અને રણબીર કપૂરની યુવા પત્ની આલિયા ભટ્ટ અભિનેત્રીની સાથે સાથે બોલીવૂડમાં પ્રોડ્યુસર તરીકે પણ પોતાનું સ્થાન જમાવી રહી છે. અત્યારે આલિયા બે ફિલ્મ ‘લવ એન્ડ વૉર’ અને યશરાજની સ્પાય થ્રિલર ફિલ્મ ‘આલ્ફા’માં વ્યસ્ત છે, તો બીજી તરફ તે એક પછી એક ફિલ્મનું નિર્માણ પણ કરી રહી છે.
તેણે આ પહેલાં પણ એમેઝોન પ્રાઇમ વીડિયો સાથે ‘પોર્ચર’ નામની એક થ્રિલર સીરિઝ પ્રોડ્યુસ કરી હતી. હવે તે પ્રાઇમ સાથે મળીને યંગ એડલ્ટ ડ્રામા પ્રોડ્યુસ કરશે. આલિયા ભટ્ટ એમેઝોન પ્રાઇમ વિડીયો અને ચૉકબોર્ડ એન્ટરટેઈનમેન્ટના સહયોગથી એટરનલ સનશાઇન પિક્ચર્સ હેઠળ આ ફિલ્મ પ્રોડ્યુસ કરશે. હજુ આ ફિલ્મનું નામ જાહેર થયું નથી, પરંતુ તે એક જીવંત ભારતીય કોલેજ કેમ્પસ પર આધારિત કહાની હશે.
આ ફિલ્મનું દિગ્દર્શન શ્રીતી મુખરજી કરશે, જેણે અગાઉ ‘યે જવાની હૈ દીવાની’ અને ‘બ્રહ્માસ્ત્ર’માં અયાન મુખરજીના આસિસ્ટન્ટ તરીકે કામ કર્યું હતું. તે આ ફિલ્મ દ્વારા દિગ્દર્શનના ક્ષેત્રમાં પદાર્પણ કરશે. મીડિયાના સૂત્રોના જણાવ્યા મુજબ, આ ફિલ્મની કહાની ‘વેક અપ સિડ’ પ્રકારની હશે, પરંતુ છોકરીના દૃષ્ટિકોણથી તેને દર્શાવવામાં આવશે. જેમાં યુવાની, આકાંક્ષાઓ અને વ્યક્તિગત વિકાસની વાત કરવામાં આવશે. તેનું શૂટિંગ ઓક્ટોબરમાં શરૂ થવાની સંભાવના છે.
આલિયા ભટ્ટનો એમેઝોન પ્રાઇમ વિડીયો સાથેનો આ પ્રથમ ફિચર-ફિલ્મ પ્રોજેક્ટ છે. પ્રોડ્યુસર તરીકેની પોતાની સફર વિશે વાત કરતાં, આલિયાએ અગાઉ કહ્યું હતું કે, ‘ફિલ્મ નિર્માણમાં નવું બહાર લાવવાની તક મળે છે અને તેમાં જેમાં હું વિશ્વાસ રાખું છું.’
આલિયાએ સૌપ્રથમ 2022 માં નેટફ્લિક્સના ડાર્લિંગ્સ સાથે પ્રોડક્શનમાં પદાર્પણ કર્યું હતું. તે મંજુ કપૂરની નવલકથા ડિફિલ્ટ ડોટર્સ પરથી બની હતી. આલિયા આગામી સમયમાં સંજય લીલા ભણસાલીની ફિલ્મ લવ એન્ડ વોરમાં રણબીર કપૂર અને વિકી કૌશલ સાથે જોવા મળશે, જે ડિસેમ્બર સુધીમાં પૂર્ણ થશે અને જૂન 2026માં રિલીઝ થવાની સંભાવના છે. તે 2026માં મેડોક ફિલ્મ્સની હોરર-કોમેડી ફિલ્મ ચામુંડામાં પણ એક્ટિંગ કરે તેવી ચર્ચા છે અને તે કલ્કી 2898 એડીના દિગ્દર્શક નાગ અશ્વિન સાથે એક પ્રોજેક્ટ માટે વાતચીત કરી રહી છે.
