હિન્દુજા ગ્રુપના ચેરમેન જી પી હિન્દુજાના નિધન પર શોક વ્યક્ત કરતાં તેમના ગાઢ સહયોગી લોર્ડ રામી રેન્જરે જણાવ્યું હતું કે તેઓ ખરેખર સમુદાયના શુભેચ્છક અને માર્ગદર્શક પ્રેરક બળ હતાં અને તેમનું મૃત્યુ એક યુગનો અંત દર્શાવે છે.
રેન્જરે જણાવ્યું હતું કે ભારે હૃદયથી, હું તમારી સાથે અમારા પ્રિય મિત્ર, જી.પી. હિન્દુજાના દુ:ખદ નિધનની વાત શેર કરું છું. તેઓ સૌથી દયાળુ, નમ્ર અને વફાદાર મિત્રોમાંના એક હતા. તેમનું અવસાન એક યુગનો અંત દર્શાવે છે, કારણ કે તેઓ ખરેખર સમુદાયના શુભેચ્છક અને માર્ગદર્શક શક્તિ હતાં.
જી પી હિન્દુજા ભારત-યુકેના ગાઢ આર્થિક સંબંધોના ખૂબ જ સ્પષ્ટ સમર્થક તરીકે જાણીતા હતાં અને તેઓ ઘણીવાર લંડનમાં સભાઓને સંબોધિત કરીને ઉદ્યોગોને તેજીવાળા ભારતીય બજારમાં રોકાણ કરવા માટે પ્રોત્સાહિત કરતાં હતાં.તેમને વર્ષોથી અનેક પુરસ્કારો મળ્યા હતાં. જેમાં તાજેતરમાં ઓગસ્ટમાં લોકમત ગ્લોબલ ઇકોનોમિક કન્વેન્શનમાં વ્યવસાય અને ઉદ્યોગમાં તેમના યોગદાન બદલ લાઇફટાઇમ એચિવમેન્ટ એવોર્ડનો સમાવેશ થાય છે.
જીપી હિન્દુજાએ તાજેતરમાં એક બિઝનેસ મીટિંગમાં જણાવ્યું હતું કે અમે હંમેશા ભારત અને યુકે વચ્ચે શ્રેષ્ઠ શું કરી શકીએ છીએ તે જોવા માટે કામ કરતા રહ્યા છીએ કારણ કે અમે માનીએ છીએ કે અમારી જવાબદારી યજમાન દેશ અને માતૃભૂમિ વચ્ચે સેતુ તરીકે કામ કરવાની છે.
તેમના મોટા ભાઈ અને ગ્રુપના સહ-અધ્યક્ષ, એસ પી હિન્દુજાનું મે 2023માં અવસાન થયું હતું. પ્રકાશ અને અશોક સહિત હિન્દુજા ભાઈઓ બ્રિટનમાં સૌથી જાણીતા ભારતીય મૂળના બિઝનેસ પરિવારોમાંના એક હતાં.
આ પરિવારની કંપનીઓનો 48 દેશોમાં ઓટોમોટિવ, તેલ અને વિશેષ રસાયણો, બેંકિંગ અને ફાઇનાન્સ, આઇટી, સાયબર સુરક્ષા, આરોગ્યસંભાળ, વેપાર, માળખાગત પ્રોજેક્ટ વિકાસ, મીડિયા અને મનોરંજન, વીજળી અને રિયલ એસ્ટેટમાં કાર્યરત છે.
