ભારતના વડાપ્રધાન નરેન્દ્ર મોદીને મળ્યાના એક દિવસ પછી બ્રિટનની અગ્રણી એરો એન્જિન ઉત્પાદન કંપની રોલ્સ-રોયસના સીઈઓ તુફાન ઇર્ગિનબિલજિકે ગુરુવારે ભારતના સંરક્ષણ, ઉર્જા અને નાગરિક ઉડ્ડયન ક્ષેત્રો માટે મેગા યોજનાની જાહેરાત કરી હતી. તેમાં ભારતમાં નેક્સ્ટ જનરેશન યુદ્ધ વિમાનો માટે એરો એન્જિનનું સહ-ઉત્પાદન કરવાની અને તેની ટેકનોલોજી ટ્રાન્સફર કરવાનો પણ સમાવેશ થાય છે. કંપની ભારતને યુકેની બહાર તેનું ત્રીજા હોમ માર્કેટ બનાવવા પર ધ્યાન કેન્દ્રીત કરી રહી છે.
આ યોજના હેઠળ રોલ્સ રોયસ ભારતમાં તેના કર્મચારીઓની સંખ્યા બમણી એટલે કે 10,000 કરશે અને સ્થાનિક બજારમાંથી ખરીદીમાં 10 ગણો વધારો કરશે. કંપનીએ તેના હાઇ ટેક મેન્યુફેક્ચરિંગ માટે ભારતને વૈશ્વિક હબ બનાવવાની પણ લાંબા ગાળાની યોજના બનાવી છે.
વડાપ્રધાન સાથે મુલાકાત ઉપરાંત ઇર્ગિનબિલજિકે ભારતના રાષ્ટ્રીય સુરક્ષા સલાહકાર અજિત ડોભાલ અને વાણિજ્ય પ્રધાન પીયૂષ ગોયલ સાથે પણ અલગથી વાતચીત કરી હતી. વડાપ્રધાન મોદીએ સોશિયલ મીડિયા પર જણાવ્યું હતું કે અમે ભારતમાં બિઝનેસ વધારવા અને અમારા ઇનોવેટિવ અને ગતિશીલ યુવાનો સાથે ભાગીદારી કરવા માટે રોલ્સ-રોયસના ઉત્સાહનું સ્વાગત કરીએ છીએ.
આ અગ્રણી એરો એન્જિન કંપનીએ યુકેની બહાર ભારતને તેનું ત્રીજુ હોમ માર્કેટ બનાવવા માટે ધ્યાન કેન્દ્રીત કરી રહી છે. કંપની જેટ એન્જિન, નેવલ પ્રોપલ્શન, લેન્ડ સિસ્ટમ્સ અને એડવાન્સ્ડ એન્જિનિયરિંગના વિકાસમાં ભારતીય બજારની સંપૂર્ણ તકનો લાભ લેવાની વ્યૂહરચના ઘડી છે.
સીઇઓએ જણાવ્યુ હતું કે અમે સ્વદેશી પ્રોપલ્શન ક્ષમતાઓ વિકસાવીને, મહત્વપૂર્ણ માળખાગત સુવિધાઓ અને ઉદ્યોગોને સતત ક્ષમતા પૂરી પાડીને અને વૈશ્વિક સપ્લાય ચેઇન માટે સ્થાનિક ઉત્પાદનનો વિસ્તાર કરીને ભારતની આત્મનિર્ભર યાત્રામાં ભાગીદાર બનવા માટે કટિબદ્ધ છીએ.
રોલ્સ-રોયસે યુકે સરકાર સાથે મળીને 120 kN ક્લાસ કોમ્બેટ જેટ એન્જિન કોરનો સહ-વિકાસ કરવાની ઓફર કરી છે જે સ્વદેશી આગામી પેઢીના એન્જિન માટે ભારતનો સૌથી ઝડપી માર્ગ બની શકે છે. આ કો-ડેવલપમેન્ટથી ભારતને IP (બૌદ્ધિક સંપદા) માલિકી સાથે સંપૂર્ણ ટેકનોલોજી ટ્રાન્સફરનો સમાવેશ થાય છે.
ભારતમાં બ્રિટિશ હાઈ કમિશનર લિન્ડી કેમેરોને રોલ્સ-રોયસની દેશ માટે વિસ્તરણ યોજનાનું સ્વાગત કરતાં જણાવ્યું હતું કે રોલ્સ-રોયસ પાસે ભારતને આપવા માટે ઘણું બધું છે. અને ભારત પાસે રોલ્સ-રોયસને આપવા માટે ઘણું બધું છે! આ જાહેરાતથી ભારતમાં રોકાણ અને નોકરીઓમાં જંગી વધારો થશે અને ભારતની વિકાસગાથામાં કંપનીના પ્રભાવશાળી યોગદાનમાં વધારો થશે.
કંપનીએ જણાવ્યું હતું કે તે સંરક્ષણ, નાગરિક ઉડ્ડયન અને ઉર્જામાં ભવિષ્યના કાર્યક્રમો અને ભાગીદારીને ટેકો આપવા માટે ભારતમાં તેના બિઝનેસને વધારવા માંગે છે તે દેશને તેના સૌથી જટિલ હાઇ-ટેક ઉત્પાદન માટે વૈશ્વિક કેન્દ્ર તરીકે સ્થાન આપવા માંગે છે.
