લોકો વિવિધ એરપોર્ટસ પર વધુ સારું વર્તન દાખવે તે માટે અમેરિકન ટ્રાન્સપોર્ટ સેક્રેટરી સીન ડફીએ હવાઇ મુસાફરી દરમિયાન પ્રવાસીઓને ફોર્મલ કપડા પહેરવા માટે વિનંતી કરી છે. ન્યૂજર્સીના નેવાર્ક એરપોર્ટ ખાતે તાજેતરમાં તેમણે મુસાફરોને ‘થોડા સન્માન સાથે’ કપડા પહેરવા પ્રોત્સાહિત કર્યા હતા. મીડિયા રીપોર્ટ મુજબ, તેમણે કહ્યું હતું કે, ‘કપડામાં ભલે જીન્સ અને યોગ્ય શર્ટ હોય, હું લોકોને થોડા સારા કપડા પહેરવા પ્રોત્સાહિત કરીશ, જે આપણને કદાચ થોડું વધુ સારું વર્તન કરવા માટે પ્રોત્સાહિત કરશે. આપણે એરપોર્ટ પર સ્લીપર અને પાયજામા ન પહેરવાનો પ્રયાસ કરવો જોઇએ. હું માનું છું કે, આ સકારાત્મક મુદ્દો છે.’ સીન ડફીએ વધુમાં કહ્યું હતું કે, ‘લોકો હવાઇ મુસાફરી દરમિયાન બેડરૂમમાં જતા હોય તેવા કપડા પહેરે છે. અમે ખૂબ જ વ્યસ્ત મુસાફરીની સીઝનમાં લોકોને આગળ વધારવા અને તેમને મદદ કરવા ઇચ્છીએ છીએ, સારા મૂડમાં હોઈએ છીએ, સારા કપડા પહેરીએ છીએ.’ આ ઉપરાંત ડફીએ મુસાફરોને અન્ય પ્રવાસીઓ પ્રત્યે સૌજન્યશીલતા દાખવીને તેમને તેમનો સામાન મુકવામાં મદદ કરવા માટે પણ અનુરોધ કર્યો હતો. ફેડરલ એવિએશન એડમિનિસ્ટ્રેશન (FAA)ના ડેટા મુજબ, 2019થી હવાઇ મુસાફરી દરમિયાન પ્રવાસીઓ દ્વારા અવ્યવહારુ વર્તન અને હિંસાની ઘટનામાં 400 ટકાનો વધારો થયો છે.
