પીઢ અભિનેત્રી માધુરી દીક્ષિતે મુંબઇના લોઅર પરેલ વિસ્તારમાં તાજેતરમાં એક ઓફિસ પાંચ વર્ષ માટે ભાડા પર લીધી છે. આ ઓફિસનું પ્રારંભિક ભાડું રૂ.4.25 લાખ હશે અને પછી દર વર્ષે આ ભાડામાં પાંચ ટકાનો વધારો થશે. તે આ પાંચ વર્ષ દરમિયાન રૂ. 2.81 કરોડ ભાડા પેટે ચુકવશે.
રજિસ્ટર કરાયેલા દસ્તાવેજોના અનુસાર, માધુરીએ 731 સ્ક્વેર ફૂટની એક કમર્શિયલ જગ્યા લીધી છે. જેમાં એક કાર પાર્કિંગ પણ સામેલ છે, જેના માટે 72,600 રૂપિયાની સ્ટેમ્પ ડયુટી અને એક હજાર રૂપિયા રજિસ્ટ્રેશનના ચૂકવ્યા છે.
આ ઉપરાંત 17 લાખ રૂપિયા ડિપોઝિટ પણ ચૂકવી છે. આ ઓફિસનું ભાડું પ્રથમ વર્ષે દર મહિને રૂપિયા 4.25 લાખ, બીજા વર્ષે વધીને 4.91 લાખ રૂપિયા, ત્રીજા વર્ષે 4.68 લાખ, ચોથા વર્ષે 4.91 લાખ અને પાંચમા વર્ષે 5.16 લાખ રૂપિયા આપશે. આ રીતે તે પાંચ વર્ષમાં ભાડા પેટે 2.81 કરોડ ચૂકવશે.
કામના મોરચે, માધુરી છેલ્લે નાગેશ કુકુનૂરની થ્રિલર શ્રેણી ‘મિસિસ દેશપાંડે’માં જોવા મળી હતી જ્યાં તે એક જટિલ સીરીયલ કિલરની ભૂમિકા ભજવે છે. તેણીએ 2024માં આવેલી ફિલ્મ ‘ભૂલ ભુલૈયા 3’માં વિદ્યા બાલન અને કાર્તિક આર્યન સાથે પણ કામ કર્યું હતું.
