અમેરિકાના પ્રેસિડન્ટ ડોનાલ્ડ ટ્રમ્પે સોમવારે નવી દિલ્હીમાં આવેલા ‘ઈન્ડિયા ગેટ’નો એક ફોટોગ્રાફ શેર કર્યો હતો અને આ ઐતિહાસિક માળખાને “સુંદર વિજયી કમાન” ગણાવ્યું હતું અને વોશિંગ્ટનમાં પણ દુનિયાનું આવું સૌથી મોટુ અને ભવ્ય સ્મારક બનાવવાની જાહેરાત કરી હતી.
ઈન્ડિયા ગેટને ભારતનો સુંદર ટ્રાયમ્ફલ આર્ક ગણાવતા ટ્રમ્પે લખ્યું હતું કે અમેરિકામાં આવું જ એક સ્મારક બનશે અને તે તમામમાં સૌથી ભવ્ય અને મોટું હશે. ૪૨ મીટર ઊંચો ઈન્ડિયા ગેટ એક આર્ક-ડી-ટ્રાયમ્ફ સ્મારક છે, જે પ્રથમ વિશ્વ યુદ્ધ અને ત્રીજા એંગ્લો-અફઘાન યુદ્ધ દરમિયાન બ્રિટિશ આર્મી માટે લડતા શહીદ થયેલા ૭૦,૦૦૦ ભારતીય સૈનિકોની યાદમાં બનાવવામાં આવ્યો છે.
ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર જણાવ્યું હતું કે તેમનું વહીવટીતંત્ર પેરિસના ‘આર્ક ડી ટ્રાયમ્ફ’ જેવી જ એક કમાન (આર્ક) બનાવવાનું વિચારી રહ્યું છે. વિશ્વના ૫૭ શહેરોમાં આવા સ્મારકો છે. વોશિંગ્ટન ડી.સી. એકમાત્ર એવું મોટું શહેર છે, જ્યાં આવું કોઈ સ્મારક નથી.
ધ વોશિંગ્ટન પોસ્ટ અનુસાર ટ્રમ્પ અમેરિકાની સ્વતંત્રતાની 250મી વર્ષગાંઠ (યુએસ 250)ની ઉજવણી માટે વોશિંગ્ટન ડી.સી.માં એક વિશાળ વિજય કમાન બનાવવાની યોજના પર વિચાર કરી રહ્યા છે. આ પ્રસ્તાવિત સ્મારક 250 ફૂટ (આશરે 76 મીટર) ઊંચું હોવાનો બનાવવામં આવે તેવો અંદાજ છે. આ આર્ક લિંકન મેમોરિયલ (100 ફૂટ ઊંચું) કરતાં બમણું ઊંચું હશે અને મેમોરિયલ બ્રિજ પાસે પોટોમેક નદીના કિનારે બનાવવામાં આવશે.
