ટી-20 વર્લ્ડકપ 2026ની મુંબઈના વાનખેડે સ્ટેડિયમમાં શનિવાર, 7 ફેબ્રુઆરીએ યોજાયેલી પ્રથમ મેચમાં અમેરિકાને 29 રનથી હરાવી ભારતે આ ટુર્નામેન્ટમાં વિજયી પ્રારંભ કર્યો હતો.
અમેરિકાની ટીમે ટોચ જીતીને ભારતને બેટિંગ માટે આમંત્રણ આપ્યું હતું. ભારતીય ટીમે 20 ઓવરમાં 9 વિકેટના નુકસાન પર 161 રન બનાવ્યા હતાં. આ ટાર્ગેટનો પીછો કરતાં અમેરિકાની ટીમ 20 ઓવરમાં 8 વિકેટના નુકસાન પર માત્ર 132 રન જ બનાવી શકી હતી.
ભારતીય વિસ્ફોટક બેટર અભિષેક શર્મા પહેલી જ ઓવરમાં ઝીરો પર આઉટ થતાં ભારતે નિરાશાજનક શરૂઆત કરી હતી. ભારતની એક સમયે 46 રનમાં ચાર વિકેટ પડી ગઈ હતી. જોકે સૂર્યકુમાર યાદવે લડાયક ઇનિંગ રમી હતી.
અભિષેક શર્મા અલી ખાનના બોલ પર ગોલ્ડન ડક પર આઉટ થયો હતો, જ્યારે પાવરપ્લેની અંતિમ ઓવરમાં શેડલી વાન શાલ્કવિકે ત્રણ વિકેટ ખેરવીને ભારતને ફટકો માર્યો હતો. યુએસએ નિયમિત અંતરાલે વિકેટો સાથે ભારતીય ટીમને દબાણમાં રાખી હતી. સૂર્યકુમારે 49 રનમાં અણનમ 84 રન બનાવ્યાં હતાં. વાન શાલ્કવિક 25 રનમાં 4 વિકેટ સાથે શ્રેષ્ઠ બોલર હતો. મોહમ્મદ સિરાજ 29 રનમાં 3 વિકેટ લીધી હતી.
અમેરિકન કેપ્ટન મોનાંક પટેલે જણાવ્યું હતું કે અમે ભારત જેવી મજબૂત ટીમ સામે શાનદાર ક્રિકેટ રમ્યા હતાં. સૌથી વધુ ખુશી એ બાબતની છે કે હજારો ભારતીય દર્શકોની હાજરીમાં અમે ટીમ ઈન્ડિયા પર દબાણ બનાવવામાં સફળ રહ્યાં હતાં. અમારા બોલરોએ પાવરપ્લેમાં શાનદાર વિકેટો ઝડપી અને ભારતીય બેટર્સને રન બનાવતા રોક્યાં હતાં. એક સમયે અમને લાગતું હતું કે અમે ભારતને 130 રનના સ્કોર પર રોકી દઈશું, પરંતુ અધવચ્ચે અમુક કેચ છૂટ્યા જે અમને મોંઘા પડ્યા. અમારી બેટિંગમાં શરૂઆત ધીમી રહી, જે હારનું મુખ્ય કારણ બની. છતાં, આ મેચમાંથી અમને ઘણું શીખવા મળ્યું છે.
ભારતીય ટીમે ટુર્નામેન્ટના એક દિવસ પહેલા પોતાની ટીમમાં એક ફેરફાર કર્યો હતો. ઇજાગ્રસ્ત હર્ષિત રાણાની જગ્યાએ મોહમ્મદ સિરાજનો ટીમમાં સમાવેશ કરાયો હતો. કેપ્ટન મોનાંક પટેલના નેતૃત્વમાં અમેરિકાએ ગયા વર્ષે પણ પોતાની નવ મેચમાંથી આઠ મેચ જીતી હતી.
