ગત વર્ષના અંતમાં બોલીવૂડ ગજવનારી ફિલ્મ ધુરંધરની સીક્વલ ફિલ્મ ધુરંધર-2 આવતા મહિને થીયેટર્સમાં રિલીઝ થશે. આ ઉપરાંત મુખ્ય ધુરંધર ફિલ્મની પણ ડિજિટલ પ્લેટફોર્મ પર આવવાની આતુરતાથી રાહ જોવામાં આવતી હતી.
આદિત્ય ધર દિગ્દર્શિત બ્લોકબસ્ટર ફિલ્મ ધુરંધર ગત મહિના અંતમાં ડિજિટલ પ્લેટફોર્મ-નેટફ્લિક્સ પર સ્ટ્રીમ થઇ હતી. આ માટે ખૂબ જ મોટી ડીલ થઇ હોવાનું માનવામાં આવે છે. સૂત્રોના જણાવ્યા મુજબ ધુરંધર અને સીક્વલ ધુરંધર-2 બંનેના ઓટીટી રાઇટ્સની એકસાથે રૂ. 130 કરોડની સંયુક્ત ડીલ કરવામાં આવી છે. થિયેટ્રિકલ બ્લોકબસ્ટર પછી લગભગ બે મહિનામાં ધુરંધર 30 જાન્યુઆરીથી ડિજિટલ પ્લેટફોર્મ પર સ્ટ્રીમ થઇ હતી. જ્યારે ધુરંધર-2 19 માર્ચના રોજ થીયેટર્સમાં રીલીઝ થશે.
ફિલ્મમાં રણવીર સિંહના પાત્ર જસ્કિરત સિંઘથી હમઝા અલી મઝારી બનવાની કહાની અને લિઆરીનો નવો રાજા બનવાની તેની સફર દર્શાવવામાં આવશે. સાથે જ, ફિલ્મમાં અક્ષય ખન્ના ઉર્ફે રહેમાન ડકૈતની સ્ટોરી પણ જોવા મળશે. વિશેષ બાબત એ છે કે ધુરંધર-2ની ટક્કર યશની ફિલ્મ ટોક્સિક સાથે થવાની છે, જે 2026ની સૌથી મોટી બોક્સ ઓફિસ ક્લેશમાં સ્થાન મેળવવાની સંભાવના ધરાવે છે.
ઉલ્લેખનીય છે કે, ગત વર્ષના અંતમાં ધુરંધરે રીલીઝ થયાના માત્ર દોઢ મહિનામાં જ બિઝનેસના અનેક રેકોર્ડ તોડ્યા હતા. આ ફિલ્મે ભારતમાં 1000 કરોડના બિઝનેસનો આંકડો પાર કર્યો છે. આ સાથે જ ફિલ્મે સિનેમાના ઇતિહાસમાં એક વિશિષ્ટ સ્થાન મેળવી લીધું છે, જ્યાં અત્યાર સુધી માત્ર ‘બાહુબલી 2: ધ કન્ક્લૂઝન’, ‘KGF: ચેપ્ટર 2’ અને ‘પુષ્પા 2: ધ રૂલ’ જેવી ફિલ્મો જ પહોંચી શકી હતી.
‘ધુરંધર’ એક જ ભાષામાં રિલીઝ થઈને આટલો માતબર બિઝનેસ કરનારી ભારતની પ્રથમ ફિલ્મ બની છે. અગાઉ આ આંકડો પાર કરનાર ફિલ્મોએ હિન્દી ઉપરાંત ચારથી પાંચ ભાષામાં ડબ થઇ હતી.
