ઇન્ડિયન એરફોર્સ ઇતિહાસમાં પ્રથમવાર એક નવી પહેલ અંતર્ગત બ્રિટિશ રોયલ એરફોર્સના પાયલટ્સને ટ્રેનિંગ આપવાની માટે તૈયારી કરી રહ્યું છે. તાજેતરમાં નવી દિલ્હીમાં યોજાયેલી 19મી યુકે-ઇન્ડિયા એર સ્ટાફ ટોક્સ દરમિયાન આ નિર્ણય લેવામાં આવ્યો હતો. આ અંગે બ્રિટિશ એરફોર્સના સૂત્રએ એક નિવેદનમાં જણાવ્યું હતું કે, ‘નવા એગ્રીમેન્ટ અંતર્ગત, ઇન્ડિયન એરફોર્સ યુકેમાં બ્રિટિશ ફાસ્ટ જેટ પાટલટ્સ માટેના ટ્રેનિંગ સેન્ટર- રોયલ એરફોર્સ (RAF) વેલીમાં ત્રણ ક્વોલિફાઇડ ફ્લાઇટ ઇન્સ્ટ્રક્ટર્સને (QFI) મોકલશે.’ આવું પ્રથમવાર બની રહ્યું છે કે, ઇન્ડિયન ક્વોલિફાઇડ ફ્લાઇટ ઇન્સ્ટ્રક્ટર્સ RAF વેલીમાં બ્રિટિશ પાયલટ્સને ફાસ્ટ જેટની ટ્રેનિંગ આપશે. તેઓ શરૂઆતમાં બે વર્ષ માટે ટ્રેનિંગ આપવા માટે આવશે.’ જ્યાં RAF અધિકારીઓની નવી પેઢીને ટ્રેનિંગ આપવામાં આવે છે, તે રોયલ એરફોર્સ કોલેજ, ક્રેનવેલ-એર એકેડેમી ખાતે આ વર્ષે જાન્યુઆરીમાં ઇન્સ્ટ્રક્ટર તરીકે ઇન્ડિયન એરફોર્સના અધિકારીને પ્રથમ વખત મોકલ્યા પછી આ નિર્ણય લેવામાં આવ્યો છે. આ પ્રકારની નવી પહેલથી ત્રણેય બ્રિટિશ મિલિટરી એકેડેમીમાં હવે ઇન્સ્ટ્રક્ટર તરીકે ભારતીય અધિકારીઓ કામ કરશે.
