અમેરિકામાં ગ્રીનકાર્ડ ધારકોને યુએસ સ્મોલ બિઝનેસ એડમિનિસ્ટ્રેશન લોન માટે અરજી કરતાં અટકાવવા માટે ટ્રમ્પ તંત્ર એક નવો નિયમ અમલમાં લાવશે. એસબીએની નોટિસમાં જણાવ્યા મુજબ, બિઝનેસની માલિકી ધરાવતા નાગરિકો માટે SBA લોન મેળવવા માટેની યોગ્યતાને મર્યાદિત કરાશે.
SBA- દેશની સરકારી એજન્સી છે, જે સમગ્ર અમેરિકામાં લાખો નાના બિઝનેસીઝને લોન આપે છે અને મદદ પણ કરે છે. ગ્રીનકાર્ડ ધારકોને, અમેરિકામાં કાયમી ધોરણે રહેવાની અને કામ કરવા માટેની મંજૂરી આપવામાં આવે છે. દેશમાં માનવાધિકાર ગ્રુપો દ્વારા ટ્રમ્પ તંત્રની ઇમિગ્રન્ટ્સ પ્રત્યેની નીતિઓની ટીકા કરવામાં આવી છે. આવા ગ્રુપો કહે છે કે, વિઝા અને ગ્રીન કાર્ડ રદ કરવા, દેશનિકાલનો પ્રયાસ અને ફેડરલ એજન્ટોની તહેનાતી જેવી સરકારી કાર્યવાહીથી લઘુમતીઓમાં ડરનું વાતાવરણ વ્યાપ્યું છે. ટ્રમ્પે આ પ્રતિબંધ દ્વારા સ્થાનિક સુરક્ષા અને છેતરપિંડી અટકાવવાનો હેતુ રજૂ કર્યો છે, જેની સામે કાયદાકીય પડકારો ઊભા છે. SBAની નોટિસમાં જણાવવામાં આવ્યું છે કે, જે લોકો 1 માર્ચથી, SBAની લોન મેળવવા ઇચ્છતા હશે તે બિઝનેસીઝના માલિકો સંપૂર્ણ રીતે અમેરિકન નાગરિકો હોવા જોઇશે અથવા તેમનું મુખ્ય નિવાસસ્થાન અમેરિકામાં હોવું જોઇશે. ડેમોક્રેટિક યુએસ રીપ્રેઝન્ટેટિવ ગ્રેસ મેંગએ આ પ્રતિબંધની ટીકા કરી હતી.
