ભારતમાં AI ક્ષમતામાં વધારો કરવા માટે ગૂગલના સીઇઓ સુંદર પિચાઈએ બુધવારે ભારત, અમેરિકા અને અન્ય સ્થળો વચ્ચે એઆઇ કનેક્ટિવિટી વધારવા માટે એક નવા સબસી કેબલ પ્રોજેક્ટની જાહેરાત કરી હતી. અમેરિકા-ઇન્ડિયા કનેક્ટ પહેલ હેઠળ ભારત અને યુએસને નવા સબસી કેબલ રૂટ મારફત જોડવામાં આવશે. આની સાથે ગૂગલે ભારતમાં વિદ્યાર્થીઓ, પ્રોફેશનલો અને કર્મયોગીઓને એઆઇ ટ્રેનિંગ આપવા માટે મોટા સ્કીલ પ્રોગ્રામોની પણ જાહેરાત કરી હતી.
સુંદર પિચાઈએ વડાપ્રધાન નરેન્દ્ર સાથે પણ મુલાકાત કરી હતી. જેમિની અને જેમ્મા જેવા AI મોડેલો વિકસાવનારી આ દિગ્ગજ કંપનીના વડાએ જણાવ્યું હતું કે મારું માનવું છે કે ભારત AI સાથે અસાધારણ પ્રગતિ કરશે અને અમે આ વિકાસયાત્રામાં ભાગીદાર બનવા માંગીએ છીએ.નવી દિલ્હીમાં એઆઇ ઇમ્પેક્ટ સમીટ 2026માં ભાગ લેવા માટે આવેલ પિચાઈએ જણાવ્યું હતું કે ગૂગલે તાજેતરમાં આંધ્રપ્રદેશના વિશાખાપટ્ટનમમાં 15 અબજ ડોલરના ખર્ચે એઆઇ હબ બનાવવાની જાહેરાત કરેલી છે. આ હબમાં એક ગીગાવોટ-સ્કેલ કમ્પ્યુટ સુવિધા અને ઇન્ટરનેશન સબસી કેબલ ગેટવે હશે. આ પ્રોજેક્ટ પૂરો થશે ત્યારે સમગ્ર ભારતના લોકો માટે નોકરીની તક ઊભી થશે તથા લોકો અને બિઝનેસને આધુનિક આઇઆઇ ટેકનોલોજીના લાભ મળશે.
આ ઉપરાંત ગૂગલે ભારતમાં વિદ્યાર્થીઓ અને કેરિયર પ્રોફેશનલ માટે ગૂગલ એઆઇ પ્રોફેશનલ સર્ટિફિકેટ જેવા મોટા સ્કીલ પ્રોગ્રામની પણ જાહેરાત કરી હતી. કંપનીઓ કર્મયોગી ભારત સાથે સીમાચિહ્નરૂપ ભાગીદારી પણ કરી છે. આ ભાગીદારી હેઠળ ગૂગલ ક્લાઉડ 800 જિલ્લાઓમાં અને 18 ભારતીય ભાષાઓમાં 2 કરોડ સરકારી કર્મચારીઓના ટ્રેનિંગ માટેના પ્લેટફોર્મને સિક્યોર ઇન્ફ્રાસ્ટ્રક્ચર પૂરું પાડશે.
પિચાઈએ જણાવ્યું હતું કે અમે 10,000થી વધુ ભારતીય શાળાઓ અને 1.1 કરોડ વિદ્યાર્થીઓને વર્ગખંડમાં રોબોટિક્સ અને કોડિંગ પર ધ્યાન કેન્દ્રિત કરીને જનરલ AI આસિસ્ટન્સ પહોંચાડવા માટે અટલ ટિંકરિંગ લેબ્સ સાથે પણ ભાગીદારી કરી રહ્યા છીએ.
રીસર્ચ અને સાયન્ટિફિક ઇનોવેશન માટે ગૂગલે 3 કરોડ ડોલરના એઆઇ ફોર સાયન્સ ઇમ્પેક્ટ ચેલેન્જની જાહેરાત કરી હતી, જે આઇઆઇમાં વૈશ્વિક સંશોધકોને સપોર્ટ કરશે. પિચાઈએ જણાવ્યું હતું કે આજે અમે ગ્લોબલ નેશનલ પાર્ટનરશિપ પ્રોગ્રામના ભાગ રૂપે ગૂગલ ડીપમાઇન્ડ અને ભારત સરકાર વચ્ચે ભાગીદારીની જાહેરાત કરતા ઉત્સાહિત છીએ. આનાથી ફ્રન્ટિયર એઆઈ ક્ષમતાઓની પહોંચમાં વધારો થશે.
