અમેરિકાની સુપ્રીમ કોર્ટપ્રેસિડન્ટ ડોનાલ્ડ ટ્રમ્પની આર્થિક નીતિઓને મોટો ફટકો આપે તેવા એક ચુકાદામાં અમેરિકાની સુપ્રીમ કોર્ટે આંતરરાષ્ટ્રીય ઇમર્જન્સી આર્થિક પાવર એક્ટ (IEEPA) હેઠળ વિશ્વભરના દેશો પર લાદેલી ટેરિફને શુક્રવારે રદ કરી દીધી હતી. 6/3 બહુમતીના ચુકાદામાં યુએસની સર્વોચ્ચ અદાલતે જણાવ્યું હતું કે બંધારણ હેઠળ આ ધારા હેઠળ ટેક્સ અને ટેરિફ લાદવાનો અધિકાર ફક્ત કોંગ્રેસ (સંસદ) પાસે છે, પ્રેસિડન્ટ પાસે નહીં. કોર્ટના આ ચુકાદા બાદ સ્પ્રિંગની જેમ ઉછળેલા ટ્રમ્પે વિશ્વના તમામ દેશો પર 15 ટકા અતિરિક્ત ટેરિફ લાગુ કરી દીધી છે.
સુપ્રીમ કોર્ટનો આ ચુકાદો ખાસ કરીને ઇમર્જન્સી સત્તા ધારા હેઠળ લાદવામાં આવેલી ટેરિફ સંબંધિત છે, જેમાં વિશ્વભરના દેશો પર લાદેલા પારસ્પરિક ટેરિફનો સમાવેશ થાય છે. બહુમતી ચુકાદામાં જણાવાયું હતું કે બંધારણે સ્પષ્ટપણે ટેરિફ સહિત ટેક્સ લાદવાની સત્તા કોંગ્રેસ (સંસદ)ને આપેલી છે. બંધારણના ઘડવૈયાઓએ એક્ઝિક્યુટિવ બ્રાન્ચને ટેક્સની કોઇ સત્તા આપી નથી. ન્યાયાધીશ સેમ્યુઅલ એલિટો, ક્લેરેન્સ થોમસ અને બ્રેટ કેવનોએ આ ચુકાદા સાથે અસંમતિ વ્યક્ત કરી હતી.
જોકે આ ચુકાદામાં બીજા કાયદા હેઠળ ડ્યૂટી લાદતા ટ્રમ્પને રોકવામાં આવ્યા નથી. ટોચના વહીવટી અધિકારીઓએ પણ કહ્યું હતું કે તેઓ અન્ય સત્તા હેઠળ ટેરિફ ફ્રેમવર્ક જાળવી રાખશે. સુપ્રીમ કોર્ટના ચુકાદા પહેલા ટ્રમ્પે જણાવ્યું હતું કે જો તેમની વિરુદ્ધ ચુકાદો દેશ માટે આર્થિક રીતે બરબાદ થઈ જશે. બંધારણ કોંગ્રેસને ટેરિફ લાદવાની સત્તા આપે છે. પરંતુ ટ્રમ્પ વહીવટીતંત્રે દલીલ કરી હતી કે ઇમર્જન્સી દરમિયાન આયાતનું નિયમન કરવાની છૂટ આપતા આ કાયદા હેઠળ પ્રેસિડન્ટ ટેરિફ લાદી શકે છે. બીજા પ્રમુખોએ પણ બીજા દેશો પર પ્રતિબંધ લાદવા માટે આ કાયદાનો ઉપયોગ કર્યો છે. જોકે ટ્રમ્પ એવા પ્રથમ પ્રેસિડન્ટ છે કે જેમણે ટેરિફ માટે તેનો ઉપયોગ કર્યો હતો.સુપ્રીમ કોર્ટના ચુકાદા બાદ ટ્રમ્પે પત્રકાર પરિષદનું આયોજન કર્યું હતું. જેમાં ટ્રમ્પે સ્પષ્ટ કહ્યું હતું કે, અન્યાયી વેપારી પદ્ધતિથી અમેરિકાનું દાયકાઓથી શોષણ કરી રહેલા દેશો પર રોક આવી છે અને અમેરિકાના અર્થતંત્રમાં સેંકડો અબજ ડોલર ઠલવાઈ રહ્યા છે.
ટેરિફ મામલે પીછેહઠને અમેરિકા માટે નુકસાનકારક ગણાવીને ટ્રમ્પે એલાન કર્યું હતું કે, પ્રમુખ તરીકે ટેરિફ લાદવાની સત્તા તેમની પાસે જ છે. કોઈ દેશને અમેરિકામાં વેપાર માટે લાયસન્સ આપવાની સત્તા તેમની પાસે હોય તો સ્વાભાવિકપણે ટેરિફ લાદવાની સત્તા પણ છે. સુપ્રીમ કોર્ટે આપેલા ચુકાદા બાદ પ્રમુખ તરીકેની પોતાની સત્તા પર કાયદાની મહોર લાગી હોવાનો દાવો કરતાં ટ્રમ્પે જણાવ્યુ હતું કે, કોઈ દેશ પર પ્રતિબંધો લાદવાનું કે તેને બરબાદ કરી દેવાનું પગલું ભરવા માટે પ્રમુખ સ્વતંત્ર હોવાનું કોર્ટે સ્વીકાર્યું છે. અમેરિકાના હિતમાં ન હોય તેવા તમામ દેશ કે ઉદ્યોગો સાથે મિત્રતા કે વેપાર રાખવામાં કોઈ રસ નહીં હોવાનું કહીને ટ્રમ્પે દાવો કર્યો હતો કે, ટેરિફમાં ઘટાડો કરવાનો કોઈ સવાલ ઉપસ્થિત થતો નથી. કોર્ટે આપેલો ચુકાદો અત્યંત નિરાશાજનક અને શરમજનક છે, પરંતુ તેઓ પ્રમુખ તરીકેની પોતાની સત્તા કે જવાબદારીમાં સહેજ પણ કાપ મૂકવા માગતા નથી.
