આફ્રિકામાં પ્રિન્સ હેરીએ તેમનાં માતા પ્રિન્સેસ ડાયનાની યાદમાં એક ચેરિટીની સ્થાપનામાં સહ-સ્થાપકની ભૂમિકા ભજવી હતી. પછી તેમણે ગત વર્ષે ચેરિટીના કથિત પેટ્રન પદેથી રાજીનામુ આપી દેતા ચેરિટીના સંચાલકોએ પ્રિન્સ હેરીની સામે માનહાનિનો કેસ કર્યો છે. મીડિયા દ્વારા કોર્ટના રેકોર્ડની સમીક્ષા થયા મુજબ, બોત્સ્વાના અને લેસોથોમાં એચઆઇવીથી પીડિત યુવાનો માટે કાર્યરત ચેરિટી- સેન્ટેબેલ દ્વારા ગત મહિને લંડનમાં હાઇકોર્ટ ઓફ જસ્ટિસમાં આ કેસ દાખલ કરવામાં આવ્યો હતો. મીડિયા રીપોર્ટમાં ટાંકવામાં આવેલા ઓનલાઇન ડોક્યુમેન્ટસ દ્વારા જણાયું હતું કે, હેરી અને તેમના સહયોગી માર્ક ડાયર પર બદનક્ષીનો દાવો કરવામાં આવી રહ્યો છે, જોકે વધુ વિગત સાથેના ડોક્યુમેન્ટસ જાહેરમાં ઉપલબ્ધ નથી. આ વિવાદના કેન્દ્રમાં એક મીડિયા કેમ્પેઇન પણ હોવાનું કહેવાય છે, જે અંગે ચેરિટીનો દાવો છે કે, તેનાથી તેમની પ્રતિષ્ઠાને નુકસાન થયું છે અને તેના કાર્યોમાં પણ અડચણો આવી છે. ચેરિટીએ તેની વેબસાઇટના માધ્યમથી એક નિવેદનમાં જણાવ્યું હતું કે, ‘તેઓ 25 માર્ચ, 2025થી ચલાવવામાં આવેલા આયોજિત નકારાત્મક મીડિયા કેમ્પેઇન પછી કોર્ટના હસ્તક્ષેપ, રક્ષણ અને વળતરની માગણી કરે છે, આવા કેમ્પેઇનને કારણે ચેરિટી, તેના નેતૃત્વ અને તેના વ્યૂહાત્મક સહયોગીને કામગીરીમાં અડચણો ઊભી થઇ છે અને તેમની પ્રતિષ્ઠાને નુકસાન થયું છે.’ આ અંગે હેરી અને ડાયરના પ્રવક્તાએ કહ્યું કે, તે બંને ‘આ અપમાનજનક અને નુકસાનકારક દાવાઓને સંપૂર્ણ ફગાવે છે.’
