એન્ડ્ર્યુએ માલિશ કરાવવાનો ખર્ચ પણ વસુલ કર્યો હતો

ધરપકડ અને ચાલુ તપાસ વચ્ચે, ભૂતપૂર્વ સિવિલ સર્વન્ટ્સ દ્વારા નવા દાવાઓ અને આરોપ લગાવવામાં આવ્યા છે કે એન્ડ્ર્યુએ યુકેના વેપાર દૂત તરીકે કામ કરતી વખતે વ્યક્તિગત માલિશ કરાવવાનો અને અતિશય મુસાફરી કરવા પેટેનો ખર્ચ પણ સરકાર પાસેથી વસુલ કર્યો હતો. જો કે તેની ડાઉનિંગ સ્ટ્રીટ દ્વારા ઔપચારિક રીતે પુષ્ટિ આપવામાં આવી નથી. પરંતુ આ દાવાઓના કારણે તેમની વિરૂધ્ધની રાજકીય તપાસમાં વધારો થયો છે.

પોલીસ તપાસમાં એન્ડ્ર્યુ પર દબાણ વધશે

ભૂતપૂર્વ મેટ્રોપોલિટન પોલીસ ચીફ સુપરિન્ટેન્ડેન્ટ, દાલ બાબુએ બીબીસી ન્યૂઝને કહ્યું હતું કે ‘’છેલ્લા કેટલાક અઠવાડિયામાં તેમના પર દબાણ વધતું રહ્યું છે. એન્ડ્ર્યુની ધરપકડ કરીને, પોલીસ કમ્પ્યુટર ગેઝેટ્સ, ફાઇલો, ફોટોગ્રાફ્સ, કોઈપણ અન્ય પુરાવાઓ સુધી પહોંચી શકશે. પોલીસ તેની માલિકીની અથવા કબજામાં રહેલી કોઈપણ જગ્યાઓ, અથવા તેમના નિયંત્રણ હેઠળની કોઈપણ જગ્યાઓની તપાસ કરી શકે છે, તેથી અન્ય વિસ્તારોમાં પણ તપાસ થઈ શકે છે.”

એપ્સટેઇન સાથે સંબંધિત આરોપોને ઇન્કાર કરતા માઉન્ટબેટન-વિન્ડસર

માઉન્ટબેટન-વિન્ડસર એપ્સટેઇન સાથે સંબંધિત ખોટા કામના તમામ આરોપોને સતત નકારી કાઢે છે.

આ અગાઉના નિવેદનોમાં, તેમણે કહ્યું છે કે તેમને ફાઇનાન્સર સાથેના તેમના જોડાણનો અફસોસ છે પરંતુ તેમણે ભારપૂર્વક જણાવ્યું છે કે તેમને ક્યારેય એપ્સટેઇનની ગુનાહિત પ્રવૃત્તિઓ વિશે ખબર નહોતી. તેમણે 2019માં શાહી ફરજો છોડી દીધી હતી અને બાદમાં તેમના માનદ લશ્કરી પદવીઓ અને શાહી સમર્થન છીનવી લેવામાં આવ્યા હતા.

માઉન્ટબેટન-વિન્ડસરના શાહી ઉત્તરાધિકાર છીનવી લેવા માંગ

આ ધરપકડને પગલે દુર્લભ અને તીવ્ર રાજકીય પ્રતિક્રિયાઓ શરૂ થઈ હતી. વેસ્ટમિન્સ્ટરના વરિષ્ઠ નેતાઓએ કાર્યવાહીની હાકલ કરી માઉન્ટબેટન-વિન્ડસરના શાહી ઉત્તરાધિકારમાં તેમનું આઠમા નંબરનું સ્થાન છીનવી લેવા માટે કાયદાની માંગ કરી છે. તો ઓસ્ટ્રેલિયાના વડા પ્રધાને તેમને ઉત્તરાધિકારથી દૂર કરવાના પ્રયાસોને જાહેરમાં સમર્થન આપ્યું છે. યુકેમાં, સંસદમાં અને શેરીમાં ટીકાકારો દલીલ કરે છે કે તેમની ધરપકડ અને અક્ષેપોથી શાહી પ્રતિષ્ઠાને ભારે નુકસાન થયું છે અને તેઓ આગ્રહ રાખે છે કે આ બાબતને શાંત રહેવા દેવી જોઈએ નહીં. યુગોવના મતદાનમાં પણ એન્ડ્ર્યુના ઉત્તરાધિકારના અધિકારો છીનવી લેવા માટે ભારે જાહેર સમર્થન મળ્યું છે.

• મહારાજા ચાર્લ્સે કહ્યું હતું કે “કાયદાએ તેનું કામ કરવું જોઈએ” અને અધિકારીઓને સહયોગ આપવા કહ્યું હતું. પરંતુ સંભવિત સંસ્થાકીય અસર વિશે સલાહકારોની ચેતવણીઓ વચ્ચે તેમણે મૌન જાળવી રાખ્યું છે.
• પ્રિન્સેસ ઓફ વેલ્સની હાઇ-પ્રોફાઇલ સ્પોર્ટ્સ ઇવેન્ટમાં મુખ્ય હાજરી સહિત રાજવી પરિવારના અન્ય વરિષ્ઠ સભ્યોએ જાહેર ફરજો ચાલુ રાખી છે.
• પેરિસના લૂવર મ્યુઝિયમની અંદર માઉન્ટબેટન-વિન્ડસરની ધરપકડ પછીનો વિશાળ ફોટોગ્રાફ લટકાવી સ્ટંટ કરાયો હતો જેણે વૈશ્વિક મીડિયાનું ધ્યાન ખેંચ્યું છે.

00000