ન્યૂયોર્કમાં તાજેતરમાં એક પાકિસ્તાની વ્યક્તિ વિરુદ્ધ એક અમેરિકન રાજકારણી, સંભવિત પ્રેસિડેન્ટ ડોનાલ્ડ ટ્રમ્પની 2024માં ચૂંટણી કેમ્પેઇન દરમિયાન હત્યાનું ષડયંત્ર રચવાનો પ્રયાસ કરવાના આરોપમાં ટ્રાયલ શરૂ થઇ છે. 47 વર્ષીય આસિફ મર્ચન્ટ નામના આ પાકિસ્તાનીએ પોતે ત્રાસવાદના પ્રયાસ અને અન્ય ફેડરલ આરોપોમાં નિર્દોષ હોવાનું જણાવ્યું હતું. 25 ફેબ્રુઆરીએ ન્યૂયોર્કમાં તેની ટ્રાયલ શરૂ થતાં, પ્રોસીક્યુટર્સે જણાવ્યું હતું કે, તે કથિત હત્યારાઓને મળ્યો હતો અને તેમને શરૂઆતમાં પાંચ હજાર ડોલર આપ્યા હતા, આ હત્યારાઓ હકીકતમાં FBIના જાસૂસ હતા. એક મધ્યસ્થીની જુબાની અને કોર્ટમાં રજૂ કરાયેલા વિડીયો મુજબ, આસિફ મર્ચન્ટે જૂન 2024માં એક સભામાં એક રાજકીય વ્યક્તિ પર ગોળીબાર કરવાનું આયોજન કર્યું હતું, પછી હત્યારાઓને ભગાડવા માટે લોકોનું ધ્યાન ભંગ કરવા માટે ત્યાં દેખાવો કર્યા હતા.
જુબાની આપનારા નદીમ અલીએ બ્રુકલિન ફેડરલ કોર્ટમાં જ્યૂરીને કહ્યું હતું કે, ‘હું ચોંકી ગયો હતો’. અલીએ કોર્ટમાં વધુમાં જણાવ્યું કે, બે દિવસની ચર્ચામાં, મર્ચન્ટે તેને હત્યારાઓને લાઇનમાં ઊભા રાખવા કહ્યું હતું. આસિસ્ટન્ટ યુએસ એટર્ની નીના ગુપ્તાએ નિવેદનના પ્રારંભમાં જણાવ્યું હતું કે, આસિફ મર્ચન્ટ હત્યારાઓએ કોને ગોળી મારવાની છે તેનું નામ આપે તે અગાઉ જ તેની ધરપકડ કરવામાં આવી હતી, પરંતુ તેણે અલીને કહ્યું કે તે ‘કોઈ એવો વ્યક્તિ હશે જે પાકિસ્તાન અને દુનિયામાં મુસ્લિમોને નુકસાન કરી રહ્યો છે.’
