બોલીવૂડ છોડીને હોલીવૂડમાં સ્થાયી થયેલી ભૂતપૂર્વ વિશ્વ સુંદરી અને અભિનેત્રી પ્રિયંકા ચોપરા હવે સ્પષ્ટતા કરી રહી છે કે, તે ક્યારેય ભારતની ભારતીય સિનેમાને છોડવા ઇચ્છતી નહોતી, પરંતુ વધુ ‘ઉત્સાહજનક’ કામની શોધમાં તેને વિદેશ જવું પડ્યું હતું.
પ્રિયંકા ચોપરાએ કહ્યું કે, કેવી રીતે એ વખતે બોલીવૂડમાં મળતી મર્યાદીત તકોને કારણે તે સમયે જે ‘ઉત્સાહજનક’ લાગ્યું તે પસંદ કર્યું હતું. બોલીવૂડમાં ઘણા વર્ષો સુધી કામ કર્યા પછી પ્રિયંકા ચોપરા અમેરિકા પહોંચી અને હોલીવૂડમાં કામ કરવાનું શરૂ કર્યું. હવે તેની ફિલ્મ બ્લફ આવી રહી છે.
એક ઇન્ટરવ્યૂમાં તેણે જણાવ્યું કે, તે ઇચ્છતી હતી કે બોલીવૂડમાં તેને મળતી મર્યાદિત તકોમાંથી બહાર આવીને વધુ સર્જનાત્મક વિકલ્પો મેળવે. તેણે વધુમાં કહ્યું, “મને લાગતું નથી કે હું ક્યારેય બોલીવૂડ છોડવા ઇચ્છ્તી હતી. હિન્દી ફિલ્મોમાં કામ કરતી વખતે ઘણા કારણોસર હું બંધાયેલી હોય એવું લાગતું હતું. મને કેટલીક બાબતોમાં દબાણ હતું, એક અભિનેત્રી તરીકે મને જે ઉત્સાહજનક લાગતી હતી એવી તકો હું શોધી રહી હતી અને અંતે હું અમેરિકામાં કામ કરવા પહોંચી ગઈ.’
પ્રિયંકા માટે પરિવર્તન સરળ નહોતું. અત્યારે પ્રિયંકા ભારત અને લોસ એન્જેલેસ વચ્ચે સંતુલન જાળવી રહી છે. એક તરફ તે એસ.એસ. રાજમૌલીની ફિલ્મનું શૂટિંગ કરી રહી છે અને બીજી તરફ પોતાની હોલીવૂડ ફિલ્મ ધ બ્લફનું પ્રમોશન પણ કરી રહી છે. તેણે વધુમાં જણાવ્યું હતું કે, ‘હું ફરીથી ભારતમાં ‘વારાણસી’માં કામ કરવા અંગે ખૂબ જ ઉત્સાહિત છું. હું નથી ઇચ્છતી કે બંનેમાંથી કોઈ એક પસંદ કરવું પડે. હું બંનેમાં કામ કરું છું અને બંને વાતાવરણમાં કામ કરવાની મજા માણું છું. સંસ્કૃતિઓની જેમ જ બંનેમાં કામ કરવાનો માહોલ પણ ઘણી રીતે જુદો છે.’
પ્રિયંકાએ એકાદ દસકા અગાઉ હોલીવૂડમાં જઇને ‘ક્વોન્ટિકો’ જેવી ફિલ્મ સાથે ત્યાં નવી કારકિર્દીનો પ્રારંભ કર્યો હતો. તેણે અમેરિકન યુવક નિક જોનાસ સાથે લગ્ન કર્યા પછી તે કેલિફોર્નિયામાં પરિવાર સાથે રહે છે.
