ગલ્ફ વોરના મંગળવારે લગભગ 11 દિવસ પુરા થયા અને હજી તો એ યુદ્ધના અંતના કોઈ સંકેત દેખાતા નથી. ઈરાન અને અમેરિકાના પ્રેસિડેન્ટ ટ્રમ્પ બન્ને એકબીજાને સામસામા પડકારો ફેંકી રહ્યા છે. અમેરિકાએ ઈરાન શરણાગતિ નહીં સ્વીકારે તો તેને ખતમ કરી દેવાની ચેતવણી આપી છે, તો ઈરાને ટ્રમ્પને કહ્યું છે કે ધ્યાન રાખજો, ક્યાંક તમે જ ખતમ થઈ જશો.
એક તરફ અમેરિકાના વોર સેક્રેટરીએ કહ્યું હતું કે મંગળવારનો દિવસ ઈરાન ઉપર સૌથી વધુ ભીષણ હુમલાનો બની રહેવાની ધારણા છે, તો બીજી તરફ ઈરાને યુએઈ તેમજ ઈઝારાયેલ ઉપર મંગળવારે વળતા હુમલા કર્યા હતા. યુએઈ સરકારે કહ્યું હતું કે તાજા હુમલામાં દેશમાં વધુ બે માણસોના મોત નિપજ્યા છે.
કેટલાક અહેવાલો મુજબ ટ્રમ્પના સલાહકારો તેમને સમજાવવા મથી રહ્યા છે કે હવે અમેરિકાએ આ યુદ્ધમાંથી ખસી જવાનો કોઈક વિકલ્પ શોધી કાઢી સિફતથી અળગા થઈ જવું જોઈએ, નહીં તો દેશમાં ફૂગાવો અને મોંઘવારી માઝા મુકશે અને પ્રજાનો મિજાજ સરકારના વિરોધમાં જશે. 11 દિવસના ભીષણ હુમલાઓ પછી પણ ઈરાન હજીયે અમેરિકા, ઈઝરાયેલને હંફાવી રહ્યું છે, તો બીજી તરફ ઈઝરાયેલે લેબેનોનનો અને ગાઝા પટ્ટીનો નવો મોરચો ખોલ્યો છે.
પેટ્રોલિયમ પેદાશો – પેટ્રોલ, ડીઝલ, એલપીજી, સીએનજી વગેરેના વધતા ભાવો યુરોપના દેશો તેમજ પાકિસ્તાનને દઝાડી રહ્યા છે, ગલ્ફના અમેરિકાના સાથી દેશોએ પણ અમેરિકાને શાનમાં સમજી જવા અનુરોધ કર્યો છે. રશિયાએ પણ વાટાઘાટોના વિકલ્પ અપનાવવા બન્ને પક્ષોને વિનંતી કરી છે.
ભારતની સ્થિતિ ધીરે ધીરે નાજુક થવાના સંકેતો મળી રહ્યા છે. ઉદ્યોગો વગેરે માટે જરૂરી એલએનજી વગેરે ઈંધણની તકલીફના પગલે તેના પુરવઠામાં કાપ મુકવાની સત્તાવાળાઓને ફરજ પડી છે, જેના પગલે મહાનગરોમાં હોટેલ, રેસ્ટોરેન્ટ ઉદ્યોગ સામે કામકાજ મર્યાદિત કરવા કે બંધ કરવાની સ્થિતિ ઉભી થઈ રહી છે, તો અનેક ઉદ્યોગોને પણ ઉત્પાદનમાં મોટા પાયે કાપ મુકવાની ફરજ પડે એ દિવસો દૂર નથી.
