અમેરિકામાં તાજેતરમાં વિવિધ ફેડરલ કોર્ટના ચુકાદાથી ઇમિગ્રેશન અટકાયતમાં રાખવામાં આવેલા ઓછામાં 15 ભારતીય નાગરિકોને મુક્ત કરવા અથવા બોન્ડની સુનાવણીનો આદેશ આપ્યો હતો.
આ ચુકાદામા ન્યાયમૂર્તિઓએ તારણ કાઢ્યું હતું કે સત્તાધિશોએ માઇગ્રન્ટ્સને યોગ્ય સુનાવણી કર્યા વગર અટકાયતમાં રાખીને બંધારણીય પ્રક્રિયાનું ઉલંલઘન કર્યું હતું. કેલિફોર્નિયા, કોલોરાડો, પેન્સિલવેનિયા, મિશિગન, કેન્ટુકી અને ન્યૂજર્સી સહિતના રાજ્યોની કોર્ટોએ આપેલા ચુકાદામાં મોટા ભાગે ભારતીય માઇગ્રન્ટ્સનો સમાવેશ થાય છે, જેમને અગાઉ ઇમિગ્રેશન અધિકારીઓએ મુક્ત કર્યા હતાં. પરંતુ પછીથી ઇમિગ્રેશન કાયદાના નવા સરકારી અર્થઘટન મુજબ ફરીથી અટકાયતામાં લેવામાં આવ્યા હતાં, પણ તે પગલાંને દેશભરની કોર્ટમાં ફગાવવામાં આવી રહ્યાં છે.
વિવિધ કોર્ટના સમીક્ષા કરાયેલા કેસોમાં 12 જેટલા ભારતીય માઇગ્રન્ટ્સને તાકીદે મુક્ત કરવાનો આદેશ અપાયો હતો, જ્યારે અન્ય ત્રણ કેસોમાં તેમની અટકાયત વાજબી છે કે નહીં તેને નક્કી કરવા માટે બોન્ડ સુનાવણી મંજૂર કરાઈ હતી. અનેક ચુકાદાઓમાં જુદા જુદા ન્યાયમૂર્તિઓએ જણાવ્યું હતું કે ઇમિગ્રેશન સત્તાધિશોએ સરહદ પર પ્રવેશ મેળવવા ઇચ્છતા લોકો માટેની જોગવાઈઓ હેઠળ લાંબા સમયથી અમેરિકામાં રહેતા માઇગ્રન્ટ્સને અયોગ્ય રીતે અટકાયતમાં રાખ્યાં હતાં.
