અમેરિકા 2 એપ્રિલથી તેના વિઝા બોન્ડ પ્રોગ્રામમાં વધુ 12 દેશોનો સમાવેશ કરશે અને તેનાથી આ પ્રોગ્રામ હેઠળના દેશોની સંખ્યા વધી 50 થશે. બે એપ્રિલથી વધુ 12 દેશોના નાગરિકોએ બિઝનેસ અને ટુરિઝમ માટે બી-વન અને બી-વન વિઝા મેળવવા માટે 15,000 ડોલરના બોન્ડ આપવા પડશે. જોકે અમેરિકામાં ઓવરસ્ટે ન કરે અને અને સમયસર યુએસ છોડી દેનારા વિઝાધારકોને આ નાણા પરત કરાશે.
આ નિયમનો હેતુ વિઝાની મુદત પછી પણ અમેરિકામાં રહેતા લોકો પર અંકુશ મેળવવાનો છે. ગેરકાયદે ઇમિગ્રન્ટ્સમાં પણ ઘટાડો થાય છે. અમેરિકાના વિદેશ વિભાગે જણાવ્યું હતું કે આશરે 1,000 વિદેશીઓને આ પ્રોગ્રામ હેઠળ વિઝા જારી કરાયા હતાં અને તેમાંથી 97 ટકા સમયસર અમેરિકા છોડીને પોતાના વતન દેશમાં પાછા ફર્યા હતાં.
બીજી એપ્રિલથી આ પ્રોગ્રામ હેઠળ વધુ 12 દેશોનો સમાવેશ થશે. તેમાં કંબોડિયા, ઇથોપિયા, જ્યોર્જિયા, ગ્રેનાડા, લેસોથો, મોરેશિયસ, મંગોલિયા, મોઝામ્બિક, નિકારાગુઆ, પાપુઆ ન્યૂ ગિની, સેશેલ્સ અને ટ્યુનિશિયાનો સમાવેશ થાય છે. અગાઉ આ યાદીમાં બાંગ્લાદેશ, ભૂતાન, ક્યુબા, ફિજી, નામિબિયા, નેપાળ, નાઇજિરાય, યુગાન્ડા, વેનેઝુએલા, ઝામ્બિયા અને ઝિમ્બાબ્વે જેવા 38 દેશોનો સમાવેશ કરાયો હતો.
વિદેશ મંત્રાલયે જણાવ્યું હતું કે ઇમિગ્રેશન જોખમ પરિબળોના આધારે આ કાર્યક્રમનો વધુ વિસ્તૃત પણ બનાવી શકાય છે. આનો અર્થ એવો થાય છે કે હજુ બીજા કેટલાંક દેશોનો પણ તેમાં સમાવેશ થઈ શકે છે.
આ પ્રોગ્રામથી અમેરિકાને થતાં નાણાકીય લાભનો ઉલ્લેખ કરતાં અધિકારીઓએ જણાવ્યું હતું કે અમેરિકામાં ગેરકાયદે રહેતાં વિદેશીઓનો દેશનિકાલ કરવા માટે અમેરિકાને સરેરાશ 18,000 ડોલરનો ખર્ચ થાય છે. વિઝા બોન્ડ પ્રોગ્રામ ઓવરસ્ટે ઘટાડે છે અને તેનાથી અમેરિકાને 80 કરોડ ડોલર સુધીની બચત થાય છે.
વિઝા બોન્ડનો નિયમ ખાસ કરીને ટૂંકા ગાળાના B1 અને B2 વિઝા પર લાગુ પડે છે. આ કેટેગરીના વિઝા સામાન્ય રીતે બિઝનેસ મુસાફરી, પર્યટન અને કૌટુંબિક મુલાકાતો માટે જારી કરવામાં આવે છે. આ બોન્ડ વિઝા શરતોનું પાલન સુનિશ્ચિત કરવા માટે નાણાકીય ગેરંટી તરીકે કાર્ય કરે છે.
