સંસ્કૃત વિદ્વતા અને હિંદુ ફિલોસોફીના ક્ષેત્રમાં ઐતિહાસિક સિદ્ધિરૂપે BAPS સ્વામિનારાયણ સંસ્થાનાના સંત મહામહોપાધ્યાય ડૉ. ભદ્રેશદાસ સ્વામીનું વર્ષ 2025 માટે ભારત સરકારે તેમના ગ્રંથ “પ્રસ્થાનચતુષ્ટયે બ્રહ્મઘોષઃ” માટે પ્રતિષ્ઠિત સાહિત્ય અકાદમી એવોર્ડથી સન્માન કર્યું હતું.
ભારતની શ્રેષ્ઠ સંસ્કૃત કૃતિ તરીકે પસંદ કરાયેલ આ ગ્રંથમાં હિંદુ ધર્મના મુખ્ય શાસ્ત્રો ઉપનિષદ, ભગવદ ગીતા અને બ્રહ્મસૂત્રની સાથે-સાથે ભગવાન સ્વામિનારાણ દ્વારા પ્રદાન કરાયેલ વચનામૃતના આધાર પર બ્રહ્મતત્વનું વિશદ અને ગહન વિવેચન કરવામાં આવ્યું છે.
સૂત્રાત્મક શૈલીમાં કાવ્યાત્મક રીતે રચાયેલ આ ગ્રંથને વિદ્વાનો દ્વારા દાર્શનિક કાવ્યની ઉત્તમ કૃતિ માનવામાં આવે છે. તેની સાહિત્યિક વિશેષતાઓ અને ઊંડાણપૂર્ણ દાર્શનિકતાને ધ્યાનમાં રાખીને નિષ્ણાતોની પસંદગી સમિતિએ તેને વર્ષ 2025ની શ્રેષ્ઠ સંસ્કૃત કૃતિ તરીકે પસંદ કરી હતી.
આ ગ્રંથ ભગવાન સ્વામિનારાયણ દ્વારા પ્રતિપાદિત દર્શનને સાહિત્યિક શૈલીમાં રજૂ કરે છે. વર્ષ 2018માં પ્રકાશિત આ કૃતિનું સર્જન પૂજ્ય મહંત સ્વામી મહારાજના માર્ગદર્શન અને પ્રેરણા કરાયું હતું.
મહામહોપાધ્યાય ડૉ. ભદ્રેશદાસ સ્વામી આંતરરાષ્ટ્રીય સ્તરે ખ્યાતિપ્રાપ્ત સંસ્કૃત વિદ્વાન અને ભારતીય તત્વજ્ઞાનના વિચારક છે. તેમની પાસે અનેક શૈક્ષણિક ડિગ્રીઓ છે, જેમાં IIT ખડગપુરમાંથી M.A., Ph.D., D.Litt. અને માનદ ડોક્ટરેટ (D.Sc.)નો સમાવેશ થાય છે. તેઓ હાલમાં BAPS સ્વામિનારાયણ સંશોધન સંસ્થાના વડા તરીકે સેવા આપે છે અને સંસ્કૃત અને વૈદિક ફિલસૂફીના પ્રચાર માટે સમર્પિત છે. ડૉ. ભદ્રેશદાસ સ્વામી “સ્વામિનારાયણ સિદ્ધાંત સુધા” (2022)ના લેખક પણ છે. તેઓ “સ્વામિનારાયણ ભાષ્યમ”ના લેખક પણ છે.
