અમેરિકન ડોલરની સામે ભારતીય રૂપિયામાં 10 મહિનાનો સૌથી મોટા કડાકો નોંધાયો હતો. ક્રૂડના ઊંચા ભાવને કારણે રૂપિયો 93.71ના તળીયે પહોંચ્યો હતો. શુક્રવારે દિવસના અંતે રૂપિયો 64 પૈસા ઘટીને 93.53 પર બંધ રહ્યો હતો. ડોલર સામે રૂપિયામાં 7 મે 2025 પછીનો સૌથી મોટો એક દિવસીય ઘટાડો નોંધાયો હતો. અગાઉ મે 2025માં ટેરિફને પગલે એક જ દિવસમાં રૂપિયો 0.96 ટકા તૂટ્યો હતો, જ્યારે શુક્રવારે 0.88 ટકા ઘટ્યો હતો. અમેરિકન ડોલર સામે રૂપિયો 82 પૈસા તૂટીને 93.71 (હંગામી)ની સપાટીએ બંધ થયો હતો. આ સ્થિતિ સર્જાવાનું કારણ એફપીઆઇની એકધારી વેચવાલી અને વધતા ભૂ-રાજકીય તણાવ વચ્ચે ક્રૂડ ઓઇલના ભાવમાં તીવ્ર વધારો છે. ફોરેક્સ ટ્રેડર્સે જણાવ્યું હતું કે ભારતીય રૂપિયો ભારે દબાણ હેઠળ છે, કારણ કે ક્રૂડ ઓઇલના ભાવમાં વધારો અને જોખમ ટાળવા તરફના વલણથી રોકાણકારોની ભાવનાઓ પર પ્રતિકૂળ અસર પડી છે. યુદ્ધ શરૂ થયું ત્યારથી અત્યાર સુધી ડોલર સામે રૂપિયામાં ત્રણ ટકાનું એટલે કે 264 પૈસાનું ધોવાણ થયું છે. જેને કારણે એશિયન કરન્સીમાં સૌથી નબળું પ્રદર્શન કરનારી કરન્સીમાં જોવાઈ છે.
