ક્રિકેટ જગતની લોકપ્રિય ટુર્નામેન્ટ આઇપીએલનો પ્રારંભ થવામાં ગણતરીના દિવસો જ બાકી રહ્યા છે ત્યારે રાજસ્થાન રોયલ્સની ટીમ માટે એક ખરાબ સમાચાર આવ્યા છે. આ ટીમનો સભ્ય અને ઇંગ્લેન્ડનો ઓલરાઉન્ડર સેમ કરન ઇજાના કારણે આઇપીએલની આ સીઝનમાં રમી શકશે નહીં, આથી ફ્રેન્ચાઇઝી હવે તેના સ્થાને અન્ય ખેલાડીની શોધ કરી રહી છે. સેમ કરન તાજેતરમાં ભારતમાં રમાયેલા આઇસીસી ટી20 ક્રિકેટ વર્લ્ડ કપમાં ઇંગ્લેન્ડની ટીમમાં હતો. ગત વર્ષે ચેન્નાઈ સુપર કિંગ્સ માટે રમેલા રવીન્દ્ર જાડેજા અને સેમ કરનને સંજુ સેમસનના બદલામાં રાજસ્થાન રોયલ્સની ટીમમાં સામેલ કરવા માટે ડીલ કરી હતી. 27 વર્ષીય સેમ કરન 2023ની હરાજીમાં 18.5 કરોડ રૂપિયા સાથે સૌથી મોંઘો ખેલાડી રહ્યો હતો. તે અગાઉ પંજાબ કિંગ્સ અને ચેન્નાઈ સુપર કિંગ્સ માટે રમી ચૂક્યો છે.
