અમેરિકામાં પ્રેસિડન્ટ ડોનાલ્ડ ટ્રમ્પની આકરી ઇમિગ્રેશન નીતિનો સૌથી વધુ ભોગ ભારત અને ચીનના લોકો બન્યાં છે. 2025ના પ્રથમ આઠ મહિનામાં અમેરિકાએ 2024ના આ સમયગાળાની સરખામણીમાં 2.5 લાખ ઓછા વિઝા જારી કર્યા હતાં.
આ સમયગામાં ભારત અને ચીનના નાગરિકો માટેના વિઝામાં આશરે 84,000નો ઘટાડો થયો હતો, જે ખાસ કરીને આ બંને દેશોના ઇન્ટરનેશનલ સ્ટુડન્ટ અને વર્કર્સમાં ઘટાડો દર્શાવે છે.
માર્ચની શરૂઆતમાં વિદેશ વિભાગે જારી કરેલા ડેટા મુજબ 2025ના જાન્યુઆરીથી ઓગસ્ટ સુધીમાં વિદેશ વિભાગે 11 ટકા ઓછા પર્મેનન્ટ રેસિડેન્ટ અને હંગામી વિઝા મંજૂર કર્યા હતાં. આ વિઝા સામાન્ય રીતે વિદ્યાર્થીઓ, વર્કર્સ અને નાગરિકોના પરિવારના સભ્યોને આપવામાં આવે છે. વોશિંગ્ટન પોસ્ટના રવિવારના રીપોર્ટ મુજબ 11 ટકાના આ ઘટાડામાં ટુરિસ્ટ વિઝાનો સમાવેશ થતો નથી. 2025ના પ્રથમ આઠ મહિનામાં બિઝનેસ અને ટુરિઝમ વિઝામાં આશરે 3.4 ટકાનો ઘટાડો થયો હતો. આમ તેમાં આશરે બે લાખનો ઘટાડો થયો હતો.
જાન્યુઆરી-ઓગસ્ટ 2024 દરમિયાન અમેરિકાએ આશરે 3.44 લાખ સ્ટુડન્ટ વિઝા જારી કર્યા હતાં. આ સંખ્યા 2025ના સમાન ગાળામાં ઘટીને આશરે 2.38 લાખ થઈ હતી. ફેમિલી પ્રેફરન્સ વિઝા, જેમાં યુએસ નાગરિકોના પુખ્ત બાળકો અને ભાઈ-બહેનોનો સમાવેશ થાય છે, તેમાં 27 ટકાથી વધુ અથવા 44,000થી વધુનો ઘટાડો થયો છે.દરિયાઈ અને વિમાની કર્મચારીઓને જારી કરાયેલા વિઝામાં પણ 30,876નો ઘટાડો થયો છે, જ્યારે કલ્ચરલ એક્સ્ચેન્જ પ્રોગ્રામ હેઠળ મુલાકાતીઓ માટે જારી કરાયેલા વિઝામાં 29,594નો ઘટાડો થયો છે.
મંગેતર/જીવનસાથીને જારી કરાયેલા વિઝા 2024ના પ્રથમ આઠ મહિનાના 37,229થી ઘટીને 2025ના સમીક્ષા હેઠળના સમયગાળામાં ઘટીને 18,894 થયા હતાં.
