ઓલ ઈંગ્લેન્ડ ક્લબે (વિમ્બલડન ગ્રાન્ડસ્લેમના આયોજક) ગયા સપ્તાહે શનિવારે (21 માર્ચ) એક મહત્વની જાહેરાત કરી હતી કે આ વર્ષે વિમ્બલ્ડન ટેનિસ ટુર્નામેન્ટમાં પ્રથમ વખત વીડિયો રીવ્યૂ (VR) ટેકનોલોજીનો ઉપયોગ કરાશે.
ટેનિસ જગતની આ સૌથી જૂની અને પ્રતિષ્ઠિત ગ્રાન્ડ સ્લેમ સ્પર્ધા હવે ટેનિસ મુકાબલા વધુ સચોટ બનાવવા આધુનિક ટેકનોલોજીનો સહારો લેશે.
જોકે આ સિઝનમાં માત્ર છ ટેનિસ કોર્ટ પર જ આ ટેકનોલોજીનો અમલ થશે. તેમાં સેન્ટર કોર્ટ, નંબર વન કોર્ટ (ક્લબનું બીજું સૌથી મોટું સ્ટેડિયમ) અને અન્ય ચાર મુખ્ય શો-કોર્ટ્સ પર આ સિસ્ટમનો ઉપયોગ કરાશે.
ઓલ ઇંગ્લેન્ડ ક્લબે આ વીડિયો સિસ્ટમ માટે કેટલાક નિયમો નક્કી કર્યા છે જે મુજબ ખેલાડીઓ ચેર અમ્પાયરના ‘ડબલ બાઉન્સ’ના નિર્ણયો સામે રીવ્યૂ માંગી શકશે. આ ઉપરાંત બોલની પિચની લાઇન અંગે પણ રીવ્યૂ લઈ શકાશે.
ખેલાડીઓ રીવ્યૂ માંગવાની કોઈ સંખ્યા મર્યાદા રખાઈ નથી. વીડિયો રીવ્યૂ ટેકનોલોજીની શરૂઆત 2023માં ન્યૂયોર્કમાં દર ઓગસ્ટમાં યોજાતી યુ.એસ. ઓપન ગ્રાન્સ્લેમથી થઈ હતી. હાલમાં ઓસ્ટ્રેલિયન ઓપનમાં પણ આ સિસ્ટમ કાર્યરત છે.
