કેન્દ્રીય કેબિનેટે પ્રાદેશિક હવાઈ કનેક્ટિવિટી વધારવા માટે સુધારેલી UDAN (ઉડે દેશ કા આમ નાગરિક) યોજનાને બુધવારે બહાલી આપી હતી. આ સુધારી યોજના હેઠળ રાજ્ય સરકારોના સહકારથી દેશમાં 100 નવા એરપોર્ટ અને 200 હેલિપેડ બનાવવાની દરખાસ્ત છે. યોજના હેઠળ સરકારે આગામી 10 વર્ષ માટે કુલ રૂ.28,840 કરોડની ફાળવણી કરી છે.
આ ફંડથી એરપોર્ટના વિકાસ, સંબંધિત કામગીરી અને મેન્ટેનન્સ પ્રવૃત્તિ, હેલિપેડ નિર્માણ અને સ્વદેશી ધોરણે ઉત્પાદિત વિમાનોની ખરીદી માટે સહાય અપાશે. એરલાઇન્સને ઉડાન રૂટ પર ઉડ્ડયન માટે 2026-27ના નાણાકીય વર્ષથી વાયેબિલિટી ગેપ ફંડિંગ (વીજીએફ) પૂરુંપડાશે, જેનો અંદાજ આગામી 10 વર્ષમાં રૂ.10,043 કરોડ છે.
કેબિનેટની બેઠક અંગે માહિતી આપતા માહિતી અને પ્રસારણ પ્રધાન અશ્વિની વૈષ્ણવે જણાવ્યું હતું કે રાજ્ય સરકારોની મદદથી હાલના બિન-સેવાવાળા હવાઈ પટ્ટાઓમાં 100 એરપોર્ટનું નિર્માણ કરાશે અને આ સંદર્ભમાં આગામી 8 વર્ષ માટે રૂ.12,159 કરોડની ફાળવણી કરાઈ છે. યોજનામાં 200 આધુનિક હેલિપેડ બનાવવાનો પણ સમાવેશ થાય છે, જેમાં દરેકનો ખર્ચ રૂ.15 કરોડ હશે. કુલ ખર્ચ આશરે રૂ.3,661 કરોડ થશે.
આ હેલિપેડ ખાસ કરી પ્રાથમિક અને ઉભરતાં જિલ્લાઓમાં બનાવવામાં આવશે, જેથી અંતિમ માઈલ કનેક્ટિવિટી અને ઈમર્જન્સી સેવાઓમાં સુધારો થાય.
સત્તાવાર યાદીમાં જણાવ્યા મુજબ એરપોર્ટ દીઠ વાર્ષિક ધોરણે રૂ.3.06 કરોડની મર્યાદામાં ઓપરેશન અને મેન્ટેનન્સ (O&M) માટે પણ સહાય અપાશે. હેલિકોપ્ટર અને વોટર એરોડ્રામ દીઠ વાર્ષિક રૂ.0.90 કરડોની સહાય અપાશે.
