ઇરાનમાં યુદ્ધ અને પ્રેસિડન્ટ ડોનાલ્ડ ટ્રમ્પની નીતિઓનો વિરોધ કરવા માટે શનિવારે અમેરિકા અને યુરોપમાં લાખ્ખો લોકોએ ‘નો કિંગ્સ’ આંદોલનના ભાગરૂપે વિશાળ રેલીઓ કાઢી હતી. વિરોધ પ્રદેશમાં મિનેસોટાએ સેન્ટરપોઇન્ટ બન્યું હતું. સેન્ટ પોલમાં મિનેસોટા કેપિટોલ લૉન અને આસપાસના રસ્તાઓ પર હજારો લોકો ખભે ખભા મિલાવીને ઉભા રહ્યાં હતા. કેટલાક લોકોએ ઊંધો યુએસ ધ્વજ પકડ્યો હતો, જે ઐતિહાસિક રીતે દુઃખનું પ્રતીક છે.
આવી રેલીઓના યુએસ આયોજકોનો અંદાજ છે કે નો કિંગ્સ રેલીના પહેલા બે રાઉન્ડમાં જૂનમાં 5 મિલિયનથી વધુ અને ઓક્ટોબરમાં 7 મિલિયનથી વધુ લોકો આવ્યા હતાં. આ વખતે તેમના 9 મિલિયન લોકો સામેલ થવાનો અંદાજ આપ્યો હતો. કેન્સાસના ટોપેકામાં સ્ટેટહાઉસની બહાર એક મોટી રેલી યોજાઈ હતી.
મિનેસોટામાં યોજાયેલી મુખ્ય રેલીમાં વિખ્યાત ગાયક બ્રુસ સ્પ્રિંગસ્ટીને ‘સ્ટ્રીટ્સ ઓફ મિનીપોલિસ’ ગીત ગાઈને પ્રદર્શનકારીઓનો ઉત્સાહ વધાર્યો હતો. આ ગીત તેમણે ટ્રમ્પ વહીવટીતંત્રની કડક ઇમિગ્રેશન નીતિઓનો વિરોધ કરવા અને ફેડરલ એજન્ટોના હાથે જીવ ગુમાવનારા રેની ગુડ અને એલેક્સ પ્રેટીને શ્રદ્ધાંજલિ આપવા માટે લખ્યું છે. આ આંદોલનને સેનેટર બર્ની સેન્ડર્સ, અભિનેતા રોબર્ટ ડીનીરો અને જેન ફોન્ડા જેવી જાણીતી હસ્તીઓએ પણ પોતાનું સમર્થન જાહેર કર્યું હતું.
વ્હાઇટ હાઉસના પ્રવક્તા એબીગેઇલ જેક્સને દેખાવકારોને ડાબેરી ભંડોળ નેટવર્ક્સની પેદાશ ગણાવી હતી. વોશિંગ્ટનમાં, સેંકડો લોકોએ લિંકન મેમોરિયલથી આગળ વધીને નેશનલ મોલમાં કૂચ કરી હતી. તેમના હાથમાં “પુટ ડાઉન ધ ક્રાઉન ” અને “શાસન પરિવર્તન ઘરેથી શરૂ થાય છે” લખેલા બેનરો હતાં. પ્રદર્શનકારીઓએ નો કિંગ્સના નારા પણ લગાવ્યા હતાં. સાન ડિએગોમાં “નો કિંગ્સ” કાર્યક્રમમાં લગભગ 40,000 લોકોએ કૂચ કરી હતી, એમ ત્યાંની પોલીસે જણાવ્યું હતું.
દેખાવકારો માત્ર યુદ્ધ જ નહીં, પરંતુ ટ્રમ્પ વહીવટીતંત્રની ઇમિગ્રેશન નીતિઓ અને ટ્રાન્સજેન્ડર અધિકારોમાં કરવામાં આવેલા ફેરફારથી પણ નારાજ છે. આ દેખાવો માત્ર અમેરિકા પૂરતા મર્યાદિત રહ્યા ન હતાં. લંડન, પેરિસ અને રોમ જેવા આંતરરાષ્ટ્રીય શહેરોમાં પણ હજારો લોકોએ એકઠા થઈને યુદ્ધ વિરોધી સૂત્રોચ્ચાર કર્યા હતા. રોમમાં દેખાવકારોએ ઇટાલીની સરકારની નીતિઓ તેમજ ઈરાન પર અમેરિકા અને ઈઝરાયલના હુમલાઓનો વિરોધ કર્યો હતો. પેરિસમાં સ્થાયી થયેલા અમેરિકનો અને માનવ અધિકાર સંગઠનોએ ટ્રમ્પના આ યુદ્ધોને અનૈતિક ગણાવીને પોતાનો રોષ ઠાલવ્યો હતો.
