ટેલિવિઝનના સૌથી જાણીતા દંપતી, દિવ્યાંકા ત્રિપાઠી અને વિવેક દહિયાને ત્યાં આ વર્ષે જૂનમાં તેમના પ્રથમ સંતાનનો જન્મ થશે. તેમણે સોશિયલ મીડિયામાં આ સમાચારને જાહેર કરતાં, તેમનાં મેટરનિટી શૂટની તસવીરો પોસ્ટ કરી હતી.
કેપ્શનમાં, તેમણે લખ્યું હતું કે, ‘10 વર્ષ પછી પ્લોટ ટ્વિસ્ટ. કેટલીક સફર દોડવા માટે નથી હોતી, તે સાથે મળીને તૈયારી કરવા માટે હોય છે અને જ્યારે તમને લાગે કે તમારી વાર્તા પૂર્ણ થઈ ગઈ છે, ત્યારે જીવન સૌથી સુંદર અધ્યાય ઉમેરાય છે. હજુ પણ આ ખુશીની ક્ષણોમાં ડૂબેલાં છીએ… કોઈ કારણ વગર હસી કરી રહ્યાં છીએ… હૃદય આભારથી ભરેલું છે, અમે સંતાનની રાહ જોઈ રહ્યા છીએ.’
‘યે હૈ મોહબ્બતેં’ની જાણીતી અભિનેત્રી દિવ્યાંકાએ જણાવ્યું હતું કે, તેણે પ્રેગ્નન્સી કિટ પરની લાઇન્સ દેખાવાની આતુરતાથી રાહ જોઈ હતી. પરિણામ પોઝિટિવ આવ્યા બાદ, તેને આ સત્ય સ્વીકારવામાં થોડો સમય લાગ્યો હતો.
પોતાના અનુભવ વિશે જણાવતા વિવેકે કહ્યું, ‘એવું લાગ્યું કે કોઈએ અમારી સ્ક્રિપ્ટ રાતોરાત બદલી નાખી છે.
શરૂઆત ખુશીથી નહોતી થઇ, તે અવિશ્વાસથી શરૂ થઈ હતી, પછી થોડાં ગભરાયાં અને છેલ્લા થોડા મહિનામાં તે શાંત ખુશીમાં બદલાઈ ગયું. મને આ સ્વીકારવામાં સમય લાગ્યો, પરંતુ હવે હું આ જવાબદારી માટે તૈયાર છું.” અત્રે ઉલ્લેખનીય છે કે, દિવ્યાંકા ટીવી પર દસથી વધુ સિરીયલ્સ અને દસ જેટલાં રિયાલિટી શોમાં જોવા મળી હતી. આ ઉપરાંત તેણે ઓટીટી પર પણ કેટલાક શો કર્યા છે, છેલ્લે તે અદૃશ્યમ નામની એક સ્પાય થ્રિલર સિરીઝમાં પણ જોવા મળી હતી.
