સેક્સ અપરાધી જેફ્રી એપસ્ટીનના યૌન શોષણનો ભોગ બનેલી 75 મહિલાઓને બેન્ક ઓફ અમેરિકા સાથેના સેટલમેન્ટને પગલે આશરે 72.5 મિલિયન ડોલરનું વળતર મળવાની ધારણા છે. આ બેન્કે એપસ્ટીનના શંકાસ્પદ નાણાકીય લેવડદેવડનો ઢાંકપિછોડો કર્યો હોવાનો આ મહિલાઓનો આરોપ હતો.
પીડિત મહિલાઓના વકીલોના જણાવ્યા અનુસાર યુએસ ડિસ્ટ્રિક્ટ જજ જેડ એસ રાકોફે સેટલમેન્ટને પ્રારંભિક મંજૂરી આપી છે અને અંતિમ મંજૂરીની સુનાવણી 27 ઓગસ્ટે થશે.
જજે જણાવ્યું હતુ કે કોઇ પણ પીડિત વળતર વગર રહી ન જાય તેની તેઓ ખાતરી કરવા માગે છે. જાતિય શોષણનો ભાગ બનેલી મહિલાઓના વકીલોએ બેન્ક ઓફ અમેરિકા સામે દાવો માંડ્યો હતો અને આરોપ મૂક્યો હતો કે બેન્કે એપસ્ટીન સંબંધિત શંકાસ્પદ નાણાકીય વ્યવહારોની અવગણના કરી હતી. જૂન 2008થી જુલાઈ 2019 સુધી એપસ્ટીને બેન્કમાં ટ્રાન્ઝેક્શન કર્યા હતાં. જુલાઈ 2019માં સેક્સ ટ્રાફિકિંગના આરોપ હેઠળ તેની ધરપકડ થઈ હતી.
એપસ્ટીનનું ઓગસ્ટ 2019માં મેનહેટનની ફેડરલ જેલમાં મોત થયું હતું, જેને આત્મહત્યા ગણાવવામાં આવી હતી.
ગુરુવારે સુનાવણીમાં એટર્ની ડેવિડ બોઈસે જણાવ્યું હતું કે પીડિત મહિલાઓના વકીલોનું માનવું છે કે 60થી 75 મહિલાઓને સેટલમેન્ટ ફંડનો લાભ મળી શકે છે. બીજી ઘણી મહિલાઓ હોઇ શકે છે જેની જાણકારી મેળવી શકાઈ નથી.
જજ રાકોફે કહ્યું કે જેફ્રી એપસ્ટીનના ભયાનક કૃત્યોના પીડિતોને સંપૂર્ણ વળતર આપવાનું કદાચ ક્યારેય મળી શકશે નહીં. જે કોઇપણ સંસ્થાએ જાણીજોઇને, બેદરકારીથી અથવા ગેરકાયદેસર રીતે સેક્સ ટ્રાફિકિંગ પ્રવૃત્તિઓમાં સામેલ હોય તેમની પાસેથી પીડિત મહિલાઓને વળતર મેળવવાનો હક છે.
