બોલીવૂડમાં છેલ્લા કેટલાક સમયથી દેશભક્તિ આધારિત ફિલ્મોનું નિર્માણ કરવાનું પ્રમાણ વધ્યું છે. અગાઉ રીલીથ થયેલી ધ સર્જિકલ સ્ટ્રાઈક (2019), ગદર 2 (2023), આર્ટિકલ 370 (2024), ધુરંધર (2025) અને બોર્ડર 2 (2026) પછી ધુરંધર 2 સહિતની ફિલ્મો સફળ પણ રહી હતી.
આ ફિલ્મોની સફળતાએ ફરીથી સાબિત કર્યું છે કે દર્શકોને વાસ્તવિક ઘટનાઓ અને આધુનિક જીઓપોલિટિક્સ પર આધારિત દેશભક્તિ વિષયક કહાનીઓ દર્શકો પસંદ કરે છે. હવે આ યાદીમાં વધુ એક પોલિટિકલ થ્રિલર જોડાવા જઈ રહી છે.
સૂત્રોના જણાવ્યા મુજબ જાણીતી ફિલ્મ અને ટીવી સીરિયલ નિર્માત્રી એકતા કપૂર, તનુજ ગર્ગ અને અતુલ કસબેકર સાથે મળીને એક નવી ફિલ્મ બનાવી રહ્યાં છે, જેનું નામ હજુ નક્કી નથી, પરંતુ તેઓ મોટાપાયે ભવ્ય ફિલ્મ બનાવવાની તૈયારી કરી રહ્યાં છે, જે ભાવનાત્મક અને ધારદાર વિષય આધારિક હશે.
આ અંગેની પ્રાથમિક માહિતી મુજબ આ ફિલ્મની કહાની કાશ્મીરના પહેલગામ હુમલા વિષયક હશે અને તેનું દિગ્દર્શન સાઉથની ફિલ્મોના લોકપ્રિય ફિલ્મકાર કરશે, જોકે તેનું નામ જાહેર કરવામાં આવ્યું નથી. અત્રે ઉલ્લેખનીય છે કે, આ ફિલ્મ દ્વારા એકતા કપૂર, તનુજ ગર્ગ અને અતુલ કસબેકર પ્રથમવાર સાથે કામ કરી રહ્યા છે.
