બોલીવૂડના કોમેડી અભિનેતા રાજપાલ યાદવ ચેક બાઉન્સ કેસમાં ફસાઈ ગયા હતા. તે રૂ. નવ કરોડનું દેવુ ચૂકવી ન શકતા જેલમાં જવું પડ્યું હતું. જોકે, કેટલીક રકમ તેણે ચૂકવી દેતા તેને શૂટિંગ કરવાની મંજૂરી મળી હતી. અત્રે ઉલ્લેખનીય છે કે, રાજપાલ યાદવની જેમ ભૂતકાળમાં બોલીવૂડના મોટા ગજાના કલાકારોને પણ નાણાકીય સંકટમાંથી પસાર થવું પડ્યું હતું. તેમના પર પણ દેવુ વધી ગયું હતું પરંતુ તેમણે તેનો સામનો કર્યો અને ફરીથી જાહોજલાલી માણી હતી. અહીં એવા દિગ્ગજ કલાકારો અંગે ટૂંકી વિગત જણાવવામાં આવી છે જેમણે આર્થિક પડકારોનો સામનો કર્યો હતો.
અમિતાભ બચ્ચન
અમિતાભ બચ્ચન એક સમયે દેવાળિયા જાહરે થયા હતા. તેમને તેમની એન્ટરટેઇનમેન્ટ કંપની-અમિતાભ બચ્ચન કોર્પોરેશન લિમિટેડ (એબીસીએલ)માં મોટું નુકસાન થયું હતું. આ કંપનીએ માતબર રકમની ખોટ કરી હતી, જેના કારણે તેમના પર રૂ. 90 કરોડનું દેવુ થઇ ગયું હતું અને કોર્ટમાં 55 કેસ થયા હતા. આ સમયે તેમને નસીબે પણ સાથ આપ્યો નહોતો, અને તેમની અનેક ફિલ્મો પણ ફ્લોપ ગઇ હતી. પછી યશ ચોપરાએ તેમને મહોબ્બતેં ફિલ્મમાં કામ આપ્યું અને તે સુપરહિટ ગઇ હતી. આ પછી તેમની સેકન્ડ ઇનિંગ્સ શરૂ થઇ હતી. આ ઉપરાંત સોની ટીવી ચેનલના લોકપ્રિય ગેમ શો- કૌન બનેગા કરોડપતિ દ્વારા તેમના નસીબ આડેનું પાંદળું ખસી ગયું હતું અને તેઓ પોતાનું દેવુ ચુકવી શક્યા હતા. મીડિયા રીપોર્ટસ મુજબ, અમિતાભ બચ્ચનની કુલ નેટવર્થ 1600 કરોડથી પણ વધુ હોવાનું કહેવાય છે.
રાજ કપૂર
બોલીવૂડના શો મેન તરીકે લોકપ્રિયતા મેળવનાર રાજ કપૂરે પોતાની કારકિર્દીમાં ઘણી સુપર-ડુપર હિટ ફિલ્મો આપી હતી. પરંતુ તેઓ ‘મેરા નામ જોકર’ જેવી ખર્ચાળ ફિલ્મ બનાવીને પાયમાલ થઇ ગયા હતા. આ ફિલ્મ ફ્લોપ જતાં તેમને ઘણી ખટો ગઇ હતી. રાજ કપૂર પર મોટું દેવુ થઇ ગયું હતું. જોકે, પછી બોબી ફિલ્મથી તેમનું નસીબ ફરીથી ચમકી ગયું હતું.
જેકી શ્રોફ
જેકી શ્રોફે વર્ષ 2003માં ફિલ્મ બૂમમાં રોકાણ કર્યું હતું, જે ફ્લોપ જવાના કારણે તેના પર પણ દેવુ વધી ગયું હતું. પોતાનું દેવુ ચૂકવવા માટે જેકીને ઘર પણ વેચવું પડયું હતું તેવું કહેવાય છે. પરંતુ તેણે હાર નહીં માનીને ફરી પોતાની કારકિર્દી પર ધ્યાન કેન્દ્રિત કર્યું અને નસીબે પણ તેમને સાથ આપ્યો હતો. તેમની ફિલ્મો હિટ થઇ અને તેઓ ફરીથી વૈભવી જીવન જીવતા થઇ ગયા.
ગોવિંદા
બોલીવૂડનો એક સમયનો ચાર્મિંગ હીરો ગોવિંદા હીરો નબંર વન તરીકે લોકપ્રિય થયો હતો. પરંતુ તેના જીવનમાં એકવાર એવો સમય પણ આવ્યો હતો કે તે આર્થિક સંકટમાં ડૂબી ગયો હતો. એ વખતે તેને સલમાન ખાને ઘણી મદદ કરી હતી. બંનેએ પાર્ટનર ફિલ્મમાં સાથે કામ કર્યું અને આ ફિલ્મ હિટ જતાં ફરીથી તેની કારકિર્દી પાટે ચઢી ગઇ હતી.
કમલ હાસન
બોલીવૂડ અને સાઉથ ઇન્ડિયન ફિલ્મોના પીઢ-લોકપ્રિય અભિનેતા કમલ હાસને પોતાની ફિલ્મ વિશ્વરુપમ્ માટે મોટો દાવ ખેલ્યો હતો. તેણે આ ફિલ્મના નિર્માણ માટે પોતાની ઘણી ચીજ-વસ્તુઓ ગીરવે મુકી હોવાનું કહેવાતું હતું. પરંતુ આ ફિલ્મ પર થોડા સમય માટે પ્રતિબંધ મુકવામાં આવતા તેને મોટું આર્થિક નુકસાન થયું હતું. આ ફિલ્મ પ્રદર્શિત થયા પછી તેને રાહત થઇ હતી. પરંતુ તેના પછી 2022માં તેની વિક્રમ હિટ થતાં જ તેણે પોતાનું તમામ દેવુ ચૂકવી દીધું હતું.
મિથુન ચક્રવર્તી
ભારતમાં મિથુન ચક્રવર્તીનો એક અનોખો ચાહક વર્ગ રહ્યો છે. તેણે ફિલ્મોની સાથે હોટેલ બિઝનેસમાં પણ નસીબ અજમાવ્યું હતું. પરંત સાઉથ ઇન્ડિયાના હિલ સ્ટેશન- ઉટીમાં તેને હોટેલમાં ઘણું આર્થિક નુકસાન થયું હતું. તે સમય તેના બદનસીબે તેની ફિલ્મની કારકિર્દી પણ ધીમી ચાલી રહી હતી. તેને આર્થિક સંકટનો સામનો કરવો પડ્યો હતો. જોકે ધીમે ધીમે તેની ફિલ્મો સફળ થઇ હતી અને તેણે પૈસા માટે ટીવી શો પણ કર્યા હતા. સમય જતાં તેની આર્થિક સ્થિતિમાં સુધારો થયો હતો.
